ކުޑަ ފިރިހެން ކުއްޖަކަށް އެކި ފަހަރު މަތިން ބިރުދައްކައިގެން ޖިންސީ ގޯނާ ކުރިކަން ސާބިތުވެ، އެ ކުއްޖާގެ ގުރުއާން ޓީޗަރުގެ މައްޗަށް ކްރިމިނަލް ކޯޓުން ކޮށްފައިވާ 15 އަހަރުގެ ޖަލު ހުކުމެއް ހައިކޯޓުން ބާތިލްކޮށްފި އެވެ.
މިއީ ކުޑަ ފިރިހެން ކުއްޖަކަށް، އެ ކުއްޖާގެ އުމުރުން 11 އަހަރުގައި ޖިންސީ ގޯނާކުރި ކަމުގެ ތުހުމަތުކޮށް 2020 ވަނަ އަހަރު ދެ މީހެއްގެ މައްޗަށް ދައުލަތުން އުފުލި ދައުވާގެ ތެރެއިން އެކެއްގެ މައްސަލަ އެވެ.
ދައުލަތުން އޭރު ދައުވާކޮށްފައިވަނީ އެ ކުއްޖާގެ ގުރުއާން ޓީޗަރާ އިސްލާމް ޓީޗަރުގެ މައްޗަށެވެ.
އިސްލާމް ޓީޗަރުގެ މައްޗަށް ދަށު ކޯޓުން ކުށް ސާބިތުނުވާ ކަމަށް ކަނޑައެޅިއިރު ގުރުއާން ޓީޗަރުގެ މައްޗަށް ކުރީ 14 އަހަރާއި 11 މަހާއި 20 ދުވަހުގެ ހުކުމެވެ.
އިސްލާމް ޓީޗަރުގެ މައްޗަށް ކުށް ސާބިތުނުވުމުން ދައުލަތުން އެ މައްސަލަ އިތުރަށް ކުރިއަކަށް ނުގެންދެ އެވެ. ގުރުއާން ޓީޗަރަށް ހުކުމް ކުރުމުން އޭނާ ދިޔައީ މައްސަލަ ހިފައިގެން ހައިކޯޓަށެވެ.
ގުރުއާން ޓީޗަރުގެ މައްޗަށް އިއްވި 15 އަހަރުގެ ޖަލު ހުކުމް އޭނާގެ ފަރާތުން ޑިސެމްބަރު 5، 2022ގައި ހައި ކޯޓުގައި އިސްތިއުނާފްކުރި އެވެ.
މި އިސްތިއުނާފު ހައިކޯޓުން އާދިއްތަ ދުވަހު ނިންމިއިރު، މައްސަލަ ބެލި ފަނޑިޔާރުންގެ ބެންޗުގެ މެޖޯރިޓީ ރައުޔަކީ ދަށު ކޯޓުގެ ހުކުމް ބާތިލު ކުރުމެވެ. މިއާ އެކު މި މައްސަލައިގައި ތުހުމަތުވާ ދެ ޓީޗަރުން ވެސް މިހާރު ވަނީ ސަލާމަތްވެފަ އެވެ.