ހުޅުމާލޭގެ ދެވަނަ ފިޔަވަހީގައި ވިނަރެސް ފްލެޓްތައް ހުރި ސަރަހައްދުގައި ހުރި މަގު ބައްތިތައް ދިއްލުމަށް އަޅާފައިވާ ކޭބަލްތައް ގެއްލިއްޖެ އެވެ.
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު މިއަދު ސޯޝަލް މީޑިއާގައި ކުރެއްވި ޕޯސްޓެއްގަިއ ވިދާޅުވީ ވިނަރެސް ފްލެޓުތައް ހުންނަ ސަރަހައްދުގައިވާ މަގު ބައްތިތައް ދިއްލުމަށް ބޭނުންވާ ކަރަންޓު ވިއުގަ މިއަހަރު އޮގަސްޓް މަހުގެ ނިޔަލަށް ވަނީ ނިންމާފައި ކަމަށެވެ.
ނަމަވެސް މަގު ބައްތިތައް ދިއްލުމަށް އަޅާފާއިވާ ކޭބަލްތައް މިހާރު ގެއްލިފައިވާ ކަމަށްވެސް ފަޒުލް ވިދާޅުވި އެވެ. މިކަމާބެހޭ އިތުރު މައުލޫމާތު އޭނާ ހިއްސާ ކުރައްވާފައެއް ނުވެ އެވެ.
ފަޒުލް އިތުރަށް ވިދާޅުވީ ވިނަރެސް ފްލެޓްތައް ހިމެނޭ ސަރަހައްދުގައި ހުރި މަގު ބައްތިތައް ދިއްލުމަށް ބޭނުންވާ ތަކެތި ހޯދުމަށް މިހާރު އޯޑަރުކޮށްފައިވާ ކަމަށެވެ.
ވިނަރެސް ފްލެޓްތައް ހުންނަ ސަހަރައްދުގައިވާ މަގު ބައްތިތައް ހަރުކުރުމުގެ މަސައްކަތް ކުރަމުންދާއިރު މަގުތައް އަނދިރިވުމުން ހިނގާ ނުރައްކާތެރި އެކްސިޑެންޓުތަކާއި އެކި ކަހަލަ ހާދިސާތަކުގެ ސަބަބުން ގިނަ ބަޔަކު އަންނަނީ ކަންބޮޑުވުން ފާޅުކުރަމުންނެވެ.