އިންޑިއާގެ މަޝްހޫރު ވިޔަފާރިވެރިޔާ އަދި ދުނިޔޭގައި ވެސް ފާހަގަކޮށްލެވޭ ޝަޚްސިއްޔަތެއް ކަމުގައިވާ ޓާޓާ ގްރޫޕްގެ ޗެއާމަން ރަތަން ޓާޓާ، 86 އަހަރުގައި އަވަހާރަވެއްޖެ އެވެ.
މުންބައީގެ ބްރީޗް ކޭންޑީ ހޮސްޕިޓަލްގައި ފަރުވާ ދެމުންދަނިކޮށް އޭނާ އަވަހާރަވެފައިވާކަން އާއިލާއިން ނެރުނު ބަޔާނެއްގައި ވަނީ ކަށަވަރުކޮށްދީފަ އެވެ.
ރަތަން ޓާޓާއަކީ އާދަޔާ ޚިލާފު ލީޑަރެއްގެ ގޮތުގައި ފާހަގަކުރެވޭ ބޭފުޅެކެވެ. އޭނާގެ މަސައްކަތްތަކުން ޓާޓާ ގްރޫޕާއި އިންޑިއާ އަށް ގިނަގުނަ ފައިދާތަކެއް ކުރިކަމަށް އާއިލާގެ ބަޔާނުގައި ބަޔާންކޮށްފައިވެ އެވެ.
އިންޑިއާގެ ބޮޑުވަޒީރު ނަރެންދްރަ މޯދީ ވަނީ ރަތަން ޓާޓާގެ އަވަހާރަވުމާ ގުޅިގެން މެސެޖެއް ދެއްވާފަ އެވެ. މޯދީ ވިދާޅުވީ ރަތަން ޓާޓާއަކީ ދުރަށް ވިސްނާވަޑައިގެން ރޭވުންތެރިކަމާ އެކު މަސައްކަތް ކުރެއްވި އޯގާތެރި އިންސާނެއް ކަމަށެވެ.
2012 ވަނަ އަހަރު ޓާޓާ ގްރޫޕްގެ ޗެއާމަންކަމުން މުސްކުޅިކުރެއްވުމަށްފަހު، އެންމެ ފަހުން އޭނާ ހުންނެވީ ޓާޓާ ސަންސްގެ ޗެއާމަންގެ މަގާމުގަ އެވެ.
ރަތަން ޓާޓާއަކީ ވިޔަފާރީގެ އިތުރުން ހިލޭސާބަހަށް މަސައްކަތް ކުރެއްވުމުގައިވެސް މަޝްހޫރު ބޭފުޅެކެވެ. އޭނާގެ މިލްކިއްޔާތުގައި 3،800 ކްރޯޑް ރުޕީސް (ގާތްގަނޑަކަށް 458 މިލިއަން އެމެރިކާ ޑޮލަރު) ހުރި ކަމަށް ލަފާކުރެވޭ ކަމަށް ރިޕޯޓުތަކުގައި ބުނެފައިވެ އެވެ. ނަމަވެސް މި ފައިސާގެ ބޮޑު ބައެއް ހޭދަކުރަނީ ޚައިރާތީ މަސައްކަތްތަކަށް ކަމަށްވެސް ބުނެވެ އެވެ.
އިންޑިއާގެ މީޑިއާތަކުން ފާހަގަކޮށްފައިވާ ގޮތުގައި، ރަތަން ޓާޓާއަކީ ތައުލީމާއި، ސިއްހީ ހިދުމަތާއި، އަދި ރަށްފުށުގެ ތަރައްގީއަށް ބޮޑެތި އެހީތަކެއް ދެއްވާފައިވާ ބޭފުޅެކެވެ. މިކަމުން ދައްކުވައިދެނީ އާންމު ރައްޔިތުންގެ ދުޅަހެޔޮކަމަށް އޭނާ ދެއްވާފައިވާ އަހައްމިއްޔަތު ކަމެވެ.