ރާއްޖެ އެތެރެކުރަން އުޅުނު ހަތް މިލިއަން ރުފިޔާގެ މަސްތުވާތަކެތި އަތުލައިގަނެފި އެވެ.
މޯލްޑިވްސް ކަސްޓަމްސް ސާވިސް އިން ހާމަކުރި ގޮތުގައި އަތުލައިގަތް މަސްތުވާތަކެތީގެ ބަރުދަނުގައި 3.48 ކިލޯ ހުއްޓެވެ.
އަތުލައިގަތް މަސްތުވާތަކެތީގެ ތެރޭގައި ހިމެނެނީ 2،440 ގްރާމް ކޮކެއިން އާއި 1،040 ގްރާމް ހެރޮއިން އެވެ.
އަތުލައިގަތް ކޮކެއިންގެ މަގުމަތީ އަގު 6.1 މިލިއަން ރުފިޔާއަށް އަދި ހެރޮއިންގެ އަގު އެއް މިލިއަން ރުފިޔާއަށް އަރާނެ ކަމަށް ލަފާކުރެވޭ ކަމަށް ކަސްޓަމްސް އިން ބުނެ އެވެ.
ކަސްޓަމްސް އިން ހާމަކުރި ގޮތުގައި ކޮކެއިން އަތުލައިގަތީ މިމަހުގެ ފަސް ވަނަ ދުވަހު ވެލާނާ އިންޓަނޭޝަނަލް އެއާޕޯޓް (ވީއައިއޭ) އިންނެވެ. އަދި ހެރޮއިން އަތުލައިގަތީ ޕޯސްޓް މެދުވެރިކޮށް ރާއްޖެ އެތެރެކުރަން އުޅެނިކޮށް މިމަހުގެ ހަތްވަނަ ދުވަހު އެވެ.
