ދިވެހި ބަހާއި ސަގާފަތާ ބެހޭ މިނިސްޓްރީގެ މުވައްޒަފުންގެ މެދުގައި ބޮޑެތި މައްސަލަތަކެއް އުފެދިފައި ވަނިކޮށް އެ މިނިސްޓްރީގެ ޕާމަނަންޓް ސެކްރެޓަރީގެ މަގާމަށް މިއަދު އާ ބޭފުޅަކު ހަމަޖައްސައިފި އެވެ.
ސިވިލް ސާވިސް ކޮމިޝަން (ސީއެސްސީ) އިން މިމަގާމަށް އައްޔަންކުރީ ހައުސިން މިނިސްޓްރީ އާއި އިސްލާމިކް ޔުނިވާސިޓީ އޮފް މޯލްޑިވްސްގައި ކުރިން މަސައްކަތް ކުރައްވާފައިވާ މުހައްމަދު ޔާނިއު ހާޝިމް އެވެ.
ދިވެހި ބަހުގެ މިނިސްޓްރީ ތެރޭގައި މައްސަލަތަކެއް އުފެދުނީ އެތަނުގެ ޑިރެކްޓާ ޖެނަރަލަކަށް ހުންނެވި އާތިކާ އިބްރާހީމް ވަގުތީ ޕާމަނަންޓް ސެކްރެޓަރީއެއްގެ ގޮތުގައި ހުންނެވިއިރު މުވައްޒަފުން ތަފާތު ކުރުމާއި، މުވައްޒަފުންނަށް ޖެއްސުން ކުރުމުގެ ގޮތުން ކަންކަން ކުރައްވަމުން ގެންދަވާ ކަމަށް ބުނެ މުވައްޒަފުންގެ ފަރާތުން މިދިޔަ މަހުގެ ތެރޭގައި ސީއެސްސީއަށް ޕެޓިޝަނެއް ހުށަހެޅުމާ ހިސާބުންނެވެ.
މި ޕެޓިޝަނަށްފަހު އާތިކާއާއި އޭނާއާ ގުޅިފައިވާ މުވައްޒަފުން އެ މިނިސްޓްރީގެ އެހެން މުވައްޒަފުންނަށް ބިރު ދައްކާ، މަސައްކަތުން އެކަހެރި ކުރާ ކަމަށް ބުނެ މިނިސްޓްރީގެ 22 މުވައްޒަފަކު ޕެޓިޝަނެއްގައި ސޮއިކޮށް ރައީސް ޑރ. މުހައްމަދު މުއިއްޒުއާ ބައްދަލުކުރުމަށްވެސް އެދިފައިވެ އެވެ.
ރައީސްއާ ބައްދަލުކުރަން މިދިޔަ މަހުގެ 25 ވަނަ ދުވަހު އެދުނު ނަމަވެސް ރައީސް މުއިއްޒު އަދި އެ މުވައްޒަފުންނާ ބައްދަލުކޮށްފައެއް ނުވެ އެވެ.