ދަނޑުވެރިކަމުގެ އުފެއްދުންތައް މާކެޓް ކުރުމަށް ގައުމީ ފެންވަރުގައި ކުރާ ހޭދަ އިތުރުކުރަންޖެހޭ ކަމަށް އެގްރިކަލްޗާ މިނިސްޓަރު ޑރ. އައިޝަތު ރަމީލާ ވިދާޅުވެއްޖެ އެވެ.
އިޓަލީގެ ވެރިރަށް ރޯމްގައި މިމަހުގެ 21 އިން 25 އަށް ކުރިއަށްދާ ކޮމިޓީ އޮން ވޯލްޑް ފުޑް ސެކިއުރިޓީ ބައްދަލުވުމުގެ ފޯރަމްތަކުގެ ތެރެއިން ކޯޑިނޭޓެޑް ޕޮލިސީ ރެސްޕޯންސަސް ޓް ފުޑް ކްރައިސިސް - ދަ ސްޓޭޓް އޮފް ދަ ފުޑް ސެކިއުރިޓީ އެންޑް ނިއުޓްރިޝަން އިން ދަ ވޯލްޑް ފޯރަމްގައި ވާހަކަ ދައްކަވަމުން ރަމީލާ ވިދާޅުވީ ދަނޑުވެރިކަމުގެ އުފެއްދުންތައް މާކެޓް ކުރުމަށް ގައުމީ ފެންވަރުގައި ކުރާ ހޭދަ އިތުރުކުރަންޖެހޭ ކަމަށެވެ.
ދުނިޔެއިން ބަޑުހައިހޫނުކަން ނައްތާލުމަށާއި، އިންސާނުންނަށް ފޯރުކޮށްދޭ ކާނާ އަކީ ފައިދާ ހުރި ރަނގަޅު ކަނާ ކަމުގައި ހެދުމަށް ކަނޑައަޅާފައިވާ ގަވާއިދުތަކާއި އުސޫލުތަކާ އެއްގޮތަށް މަސައްކަތް ކުރުމަށް ދިމާވާ ދަތިތަކާ ބެހޭގޮތުންވެސް ރަމީލާ ވަނީ ވާހަކަ ދައްކަވާފަ އެވެ.
ރަމީލާ ވިދާޅުވީ ރާއްޖެއަކީ ވެސް ކަނާގެ ރައްކާތެރިކަން ކަށަވަރު ކުރަންޖެހޭ ގައުމެއް ކަމަށެވެ. އަދި އިމްޕޯޓު ކުރާ ކަނާއަށް ބަރޯސާވުމުގެ ބަދަލުގައި އުފެއްދުންތެރިކަން އިތުރުކުރުމަށް ކުރާ މަސައްކަތްތަކަކީ ތިމާވެށްޓާއި ރައްޓެހި ގޮތަކަށް ކުރެވޭ މަސައްކަތަކަށް ހަދައި ދަނޑުވެރިކަމުގެ އުފެއްދުންތެރިކަން އިތުރު ކުރަންޖެހޭ ކަމަށް ރަމީލާ ވަނީ ވިދާޅުވެފަ އެވެ.
ދަނޑުވެރިކަމުގެ ސިނާއަތުގައި ރާއްޖެއަށް ހުރި ގޮންޖެހުންތައް ފާހަގަކުރައްވަމުން ރަމީލާ ވިދާޅުވީ މޫސުމީ ބަދަލުތަކާއި، އެކަށީގެންވާ ބިން ނުލިބުމާއި، އަދި ތަފާތު ގޮތް ގޮތަށް ދުނިޔެއަށް އަންނަ ބަދަލުތަކަކީ ރާއްޖެއަށް ހުރި ގޮންޖެހުންތަކެއް ކަމަށެވެ.
ގައުމީ ފެެންވަރުގެ އުފެއްދުންތައް އިތުރުކުރުމަށް ދަނޑުވެރިކަމުގެ އާ ގޮތްތައް ތައާރަފްކޮށް އެކަންކަމަށް އާންމުންގެ ހޭލުންތެރިކަން އިތުރުކުރުމާއި ދަނޑުވެރިކަމުގައި ބޭނުންކުރާ ހަކަތައަކީ އިއާދަކުރަނިވި ހަކަތައަށް ބަދަލުކުރުމަކީ މުހިއްމު ކަމެއް ކަމަށްވެސް ރަމީލާ ވަނީ ވިދާޅުވެފަ އެވެ