ސިއްހީ ހާލު ހުރި ގޮތުން އެގްރިކަލްޗާ މިނިސްޓަރު ޑރ. އާއިޝަތު ރަމީލާ މަގާމުން އިސްތިއުފާ ދެއްވައިފި އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ މިނިސްޓަރު ރަމީލާގެ އިސްތިއުފާ ގަބޫލުކުރައްވާފަ އެވެ.
ރަމީލާގެ އިސްތިއުފާ ގަބޫލުކުރައްވާ ރައީސް މުއިއްޒު ނެރުއްވި ނޫސްބަޔާނުގައި ވަނީ އަލާސްކަންފުޅުގައި އުޅުއްވަމުންވެސް އެގްރިކަލްޗާ މިނިސްޓަރުގެ ހައިސިއްޔަތުން ސަރުކާރަށް ކޮށްދެއްވި އަގުހުރި ހިދުމަތަށްޓަކައި ޝުކުރު އަދާކުރައްވާފަ އެވެ.
"ޑރ. އާއިޝަތު ރަމީލާ، އަލާސްކަންފުޅުގައި އުޅުއްވަމުންވެސް، މިނިސްޓާ އޮފް އެގްރިކަލްޗާ އެންޑް އެނިމަލް ވެލްފެއާގެ ހައިސިއްޔަތުން ދިވެހިރާއްޖޭގެ ޤާނޫނީ ވެރިކަން ކުރިއަރުވައި، އެންމެހައި ރައްޔިތުންނަށް ލާބައާއި ފާގަތިކަން ހޯދައިދެނިވިމަގުން، މި ދައުލަތުގެ ކަންތައްތައް ރަނގަޅަށް ހިންގުމުގައި އެހީތެރިވުމަށް، އަޅުގަނޑަށް ދެއްވި އެއްބާރުލެއްވުމަށާއި ތެދުވެރިކަމާއި ވިސްނުންތެރިކަމާއެކު ސަރުކާރަށް ކޮށްދެއްވި އަގުހުރި ހިދުމަތްތަކަށްޓަކައި އަޅުގަނޑު ވަރަށް އިހްލާސްތެރިކަމާއެކު ޝުކުރުއަދާކުރަމެވެ،" ރައީސް މުއިއްޒު ނެރުއްވި ނޫސްބަޔާނުގައި ވިދާޅުވެފައިވެ އެވެ.
ރައީސް މުއިއްޒު ވިދާޅުވީ ރަމީލާ ފަދަ ހީވާގި އަމާނާތްތެރި ގާބިލު ބޭފުޅަކު ވަޒީރުންގެ މަޖިލީހުގައި ހިމެނުމަކީ ލިބުނު ވަރަށް ބޮޑު އުފަލެއް ކަމަށާއި ކުރިއަށް އޮތްތާނގައިވެސް ރަމީލާގެ ހިދުމަތް ދިވެހި ގައުމަށް ލިބޭނެކަން ޔަގީންކުރައްވާ ކަމަށެވެ.
ރައީސްގެ ބަޔާނުގައި ވަނީ ރަމީލާއަށް އަވަސް އަދި ދާއިމީ ޝިފާއެއް ދެއްވުމަށް އެދި ދުއާ ކުރައްވާފަ އެވެ.
"އަޅުގަނޑުގެ ދުއާއަކީ، ޑޮކްޓަރ ޢާއިޝަތު ރަމީލާގެ ސާބިތުކަމާއި ކެތްތެރިކަން އިތުރު ކުރައްވައި މާތްﷲ ގެ ތަނަވަސް ރަޙުމަތްފުޅުން ޑޮކްޓަރ ޢާއިޝަތު ރަމީލާއަށް އަވަސް އަދި ދާއިމީ ޝިފާއެއް މިންވަރު ކުރައްވައި އަދަށްވުރެ އުފާވެރި ފާގަތި މުސްތަޤުބަލެއް މިންވަރުކުރެއްވުމެވެ،" ރައީސްގެ ބަޔާނުގައި ވިދާޅުވެފައިވެ އެވެ.
ޑރ. ރަމީލާއަށް ކެންސަރު ޖެހިފައިވާ ކަމާއި އެކަން އެނގިވަޑައިގަތީ އެންމެ ފަހު ސްޓޭޖުގައި ހުއްޓާ ކަމަށް އެކަމަނާ ހާމަކުރެއްވީ މިދިޔަ އަހަރުގެ ނޮވެމްބަރު މަހު ސޯޝަލްމީޑިއާގައި ކުރެއްވި ޕޯސްޓެއްގައެވެ.
ރަމީލާ ގައުމީ ހިދުމަތް ފެއްޓެވީ ނަރުހެއްގެ ގޮތުގައި 1990 ވަނަ އަހަރު އެވެ. މިނިސްޓަރު ކަމާ ހަވާލުވެވަޑައިގަތުމާ ހަމައަށް އެކަމަނާ ހުންނެވީ އެވިޑް ކޮލެޖުގެ އިސް މަގާމެއްގައެވެ.
ޑރ. ރަމީލާ ސިޔާސީ ގޮތުން ފާހަގަކުރެވިގެން ދިޔައީ ރައީސް އަބްދުﷲ ޔާމީންގެ ވެރިކަމުގައި ހެލްތު މިނިސްޓްރީގެ ސްޓޭޓް މިނިސްޓަރެއްގެ މަގާމަށް އައްޔަންކުރެއްވުމާ ގުޅިގެންނެވެ.