ޓެކްސް އެޕީލް ޓްރައިބިލުނަލަށް ކުރިމަތިލެއްވި ބޭފުޅުންގެ ތެރޭގައި ސުޕްރީމް ކޯޓުގެ ކުރީގެ ފަނޑިޔާރު އަބްދުލްޣަނީ މުހައްމަދު ހިމެނިވަޑައިގެންފި އެވެ.
ޓެކްސް އެޕީލް ޓްރައިބިއުނަލްގެ ހަތަރު މެންބަރަކު މަގާމުން ވަކިކޮށްފައިވާތީ ހުސްވި މެންބަރު ކަމަށް ކުރިމަތިލުމަށް ހުޅުވާލި ފުރުސަތުގައި ކުރިމަތިލެއްވި ހުރިހާ ބޭފުޅުންގެ ނަންތައް ރައްޔިތުންގެ މަޖިލީހަށް ފޮނުއްވަވާ އޭގެ ތެރެއިން ހަތަރު ބޭފުޅަކަށް ރުހުން ހޯދުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަޖިލީހަށް ވަނީ ހުށަހަޅުއްވާފަ އެވެ. ރައީސް ހުށަހެޅުއްވި ނަންތަކުގެ ތެރޭގައި ސުޕްރީމް ކޯޓުގެ ކުރީގެ ފަނޑިޔާރު އަބްދުލްޣަނީ މުހައްމަދުގެ ނަންވެސް ހިމެނެ އެވެ.
ޣަނީ އަކީ މިސްރުގެ އަލްއަޒްހަރު ޔުނިވަސިޓީ އިން ޝަރީއަތާއި ގާނޫނުގެ ރޮނގުން މަތީ ތައުލީމު ހާސިލް ކުރައްވައިގެން ހުންނެވި ބޭފުޅެކެވެ. ޣަނީ ވަނީ ކުރިން ހައިކޯޓުގެ ފަނޑިޔާރުކަމާއި ހައިކޯޓުގެ އިސްފަނޑިޔާރު ކަމުގެ މަގާމުވެސް ފުރުއްވާފަ އެވެ.
ޣަނީ ހައިކޯޓުގެ ފަނޑިޔާރުކަމަށް އިސްކުރެއްވީ މާޗް 14، 2004 ގައެވެ. އަދި ސެޕްޓެމްބަރު 21، 2008 އިން އޭޕްރީލް 26، 2011 އަށް ޣަނީ ވަނީ ހައިކޯޓްގެ އިސްފަނޑިޔާރުގެ މަގާމު ފުރުއްވާފަ އެވެ. ސުޕްރީމް ކޯޓުގެ ފަނޑިޔާރު ކަމަށް ޣަނީ އައްޔަންކުރެއްވީ ޖޫން 28، 2018 ގައެވެ. ޣަނީ ސުޕްރީމް ކޯޓުގެ ފަނޑިޔާރުކަމުން ވަކިކުރީ ނިމިދިޔަ އެމްޑީޕީގެ ވެރިކަމުގައެވެ.
ޓެކްސް އެޕީލް ޓްރައިބިއުނަލްގެ ހަތަރު މެމްބަރަކު ވަކިކުރުމަށް ރައްޔިތުންގެ މަޖިލީހުން ފާސްކުރީ މިދިޔަ އޮގަސްޓް 19 ވަނަ ދުވަހު އެވެ. މަޖިލީހުގެ ލަފައާއި އެއްގޮތްވާ ގޮތުގެ މަތިން ރައީސުލްޖުމްހޫރިއްޔާ، ހަތަރު މެންބަރުން ވަކިކުރެއްވީ މިދިޔަ އޮގަސްޓް 26 ވަނަ ދުވަހު އެވެ.