ފަނޑިޔާރުންނާއި ފަނޑިޔާރު ގެތައް ވަރަށް ބޮޑަށް "ކަންނެތްވެއްޖެ" ކަމަށް ވިދާޅުވެ ރައްޔިތުންގެ މަޖިލީހުގެ ވެލިދޫ ދާއިރާގެ މެންބަރު މުހައްމަދު އައްބާސް ޝަރުއީ ދާއިރާއަށް ވަރަށް ބޮޑަށް ފާޑު ވިދާޅުވެއްޖެ އެވެ.
ރައްޔިތުންގެ މަޖިލީހުގައި މިއަދު ކުރިއަށް ދިޔަ މަސްތުވާތަކެއްޗާ ބެހޭ ގާނޫނަށް އިސްލާހު ގެނައުމުގެ ބިލްގައި އައްބާސް ވިދާޅުވީ މަސްތުވާތަކެތި ހުއްޓުވޭނީ ފުލުހުންނާއި ކަސްޓަމްސް އަދި ޖުޑިޝަރީ ގުޅިގެން ކަމަށާއި ފަނޑިޔާރުން "ކަންނެތްކަމުން" ސަލާމަތްވާން ޖެހޭ ކަމަށެވެ.
ރައްޔިތުންގެ ހައްގުގައި މަޖިލީހުގެ މެންބަރުން ޗުއްޓީ ނުނަގައި ތިބިއިރު ފަނޑިޔާރުން ޗުއްޓީ ނަގަމުންދާ ކަމަށް ވިދާޅުވެ އައްބާސް ވަނީ ފަނޑިޔާރުގެތަކަށް ފާޑު ވިދާޅުވެފަ އެވެ.
"މި އިއްޒަތްތެރި މަޖިލީހުގެ އިއްޒަތްތެރި މެންބަރުން މި ތިބީ ޗުއްޓީ ނުނަގައި ރައްޔިތުންގެ ހައްގުގައި. ފަނޑިޔާރު ހަމަ ޖެހޭތޯ ކޮންމެ އަހަރަކު އެއް ފަހަރު އެއް މަސް ދުވަހު ނޫނީ ދެ މަސް ދުވަހު އެ ބޭފުޅުން ޗުއްޓީ ނަންގަވަން. ނުޖެހޭ. ނުނިމި ހުރި މައްސަލަތައް ނިންމަވަންވީ،" އައްބާސް ވިދާޅުވި އެވެ.
ފަނޑިޔާރުންނަށް އިނާޔަތާއި ހިމާޔަތް އަދި ބޮޑެތި މުސާރަ ލިބޭތީ އެކަމަށްވެސް އައްބާސް ވަނީ ފާޑު ވިދާޅުވެފަ އެވެ.
"ފަނޑިޔާރު ގެތައް ކަންނެތްވެއްޖެ މިހާރު. އެކަމަކު އެ ބޭފުޅުންނަށް އެތިބެނީ ހިމާޔަތާއި އިނާޔަތާއި ރައްކާތެރިކަމާ ދީފަ. 80،000 އިން 90،000 އެއްލައްކަ ރުފިޔާއިން ބޮޑެތި މުސާރަ ދީފައި،" އައްބާސް ވިދާޅުވި އެވެ.
އޭނާ މިހެން ވިދާޅުވީ މާލޭގައި ހިންގާ ބައެއް ކޯޓުތައް މިމަހުން ފެށިގެން ޗުއްޓީއަށް ގޮސްފައި ވަނިކޮށެވެ.
އެގޮތުން މިމަހުގެ ފުރަތަމަ ދުވަހުން ފެށިގެން އަންނަ ޖެނުއަރީ މަހުގެ އެއްވަނަ ދުވަހުގެ ނިޔަލަށް ސުޕްރީމް ކޯޓު ވަނީ ޗުއްޓީއަށް ގޮސްފަ އެވެ.
ހައިކޯޓު ޗުއްޓީއަށް ދިޔައީ މިމަހުގެ ފުރަތަމަ ދުވަހުން ފެށިގެން މިމަހުގެ 31 ވަނަ ދުވަހުގެ ނިޔަލަށެވެ. ސިވިލް ކޯޓު ޗުއްޓީއަށް ދިޔައީ މިމަހުގެ ފުރަތަމަ ދުވަހުން ފެށިގެން މިމަހުގެ 20 ވަނަ ދުވަހުގެ ނިޔަލަށެވެ. ކްރިމިނަލް ކޯޓުވެސް މިމަހު ޗުއްޓީއަށް ދެއެވެ.
ކޯޓުތައް ޗުއްޓީއަށް ދިއުމުން އާންމުކޮށް ހިނގާ ޝަރީއަތްތައް ކުރިއަކަށް ނުދާނެ އެވެ. އެކަމަކު ކޯޓުތަކުގެ އިދާރީ މަސައްކަތްތައް ކުރިއަށްދާނެ އެވެ.