ޔުއެފާ ޗެމްޕިއަންސް ލީގުގައި އެމިރޭޓްސް ސްޓޭޑިއަމްގައި ރޭ ކުޅުނު މެޗުން އާސެނަލް އިން ވަނީ ޝަހުތަރު ޑޮނެސްކް 1-0 އިން ބަލިކޮށްފަ އެވެ.
ނަމަވެސް މި މެޗުގައި އާސެނަލްގެ އަގުބޮޑު ޑިފެންޑަރު އިޓަލީގެ ރިކާޑޯ ކަލަފިއޯރީއަށް ވަނީ ސީރިއަސް އަނިޔާއެއް ލިބިފަ އެވެ.
މެޗުގެ ހަމައެކަނި ގޯލަކީ ޝަހުތަރުގެ ގޯލްކީޕަރު ޑިމިޓްރޯ ރިޒްނީކްގެ އަމިއްލަ ގޯލެކެވެ. އާސެނަލްގެ ގަބްރިއެލް މާޓިނެލީ ޖެހި ބޯޅަ ގޯލު ދަނޑީގައި ޖެހި، ގޯލްކީޕަރުގެ ގައިގައި ޖެހުމަށްފަހު ގޯލަށް ވަނެވެ.
ފަންސާސް މިލިއަން ޑޮލަރަށް އާސެނަލްއާ ގުޅުނު އިޓަލީ ޑިފެންޑަރު ކަލަފިއޯރީ އަށް އަނިޔާވީ ދެވަނަ ހާފުގަ އެވެ. މިއީ އޭނާ އާސެނަލްގެ ފުރަތަމަ އެގާރައިގައި ހިމެނިގެން ކުޅުނު ހަތްވަނަ މެޗެވެ. ކަކުލަށް ލިބުނު އަނިޔާގެ ސަބަބުން މެޗު ކުރިއަށް ނުގެންދެވިގެން އޭނާ ވަނީ ބަދަލުކުރަން ޖެހިފަ އެވެ.
"މިވަގުތު ކަލަފިއޯރީގެ އަނިޔާއާ މެދު ވަކި އެއްޗެއް ދެންނެވޭކަށް ނެތް. ޓެސްޓުތަކުގެ ނަތީޖާ ބެލުމަށްފަހު އެކަނި އެނގޭނީ. އެހެންނަމަވެސް މިހާރު ފެންނަ ގޮތުން މިއީ ސީރިއަސް މައްސަލައެއް،" އާސެނަލްގެ ކޯޗު މިކޭލް އާޓެޓާ މެޗަށްފަހު ބުންޏެވެ.
މިވަގުތު އާސެނަލްގެ އަނިޔާވެފައިވާ ކުޅުންތެރިންގެ ލިސްޓް ވަނީ އިތުރަށް ދިގު ވެފަ އެވެ. ޓީމުގެ ކެޕްޓަން މާޓިން އޮޑެގާޑް، ބުކާޔޯ ސަކާ އަދި ޖޫރިއަން ޓިމްބާ ވެސް އަންނަނީ އަނިޔާއަށް ފަރުވާ ހޯދަމުންނެވެ.
މީގެއިތުރުން ޕްރިމިއާ ލީގުގައި ލިވަޕޫލާ ދެކޮޅަށް ކުރިއަށް އޮތް މެޗުގައި ޑިފެންޑަރު ވިލިއަމް ސަލީބާވެސް ނުކުޅެވޭނެ އެވެ. އެއީ އެންމެ ފަހުން ކުޅުނު ލީގު މެޗުގައި ދެއްކި ރަތް ކާޑުގެ ސަބަބުންނެވެ.