ބޭންކް އޮފް މޯލްޑިވްސް (ބީއެމްއެލް)ގެ ދައުރު ފުޅާކުރުމަށް ސަރުކާރުން އަބަދުވެސް ވާގިވެރިވަމުން ދާނެ ކަމުގެ ޔަގީންކަން ސަރުކާރުން ދީފި އެވެ.
ބީއެމްއެލްއަށް މިފަދަ ޔަގީންކަމެއް ސަރުކާރުން ދީފައި މިވަނީ ދިވެހި ރައްޔިތުންގެ ލާބަޔާއި މަންފާއަށްޓަކައި އަދި ރައްޔިތުންނަށް ދަތިވާ ކަންކަން ހައްލުކޮށްދިނުމުގައި ރައީސް ޑރ. މުހައްމަދު މުއިއްޒު، ކަނޑައަޅުއްވާ ސިޔާސަތުތައް ތަންފީޒުކުރުމަށް ބީއެމްއެލް އިން ދޭ އެއްބާރުލުމަށް ޝުކުރު އަދާކުރާ ކަމަށް ބުނެ ސަރުކާރުން ނެރުނު ބަޔާނެއްގައެވެ.
ސަރުކާރުން ބީއެމްއެލް އަށް ޝުކުރު އަދާކުރީ ރާއްޖެއިން ބޭރުގައި ކިޔަވާ ދަރިވަރުންނަށް ބީއެމްއެލްގެ ޑޮލަރު ލިމިޓް 1،200 އަށް ބޮޑުކުރަން ސަރުކާރުން ނިންމާފައި އޮތް ތަންފީޒު ކުރުމަށް އެ ބޭންކުން އިއްޔެ ނިންމުމާ ގުޅިގެން ނެރުނު ބަޔާނުގައެވެ.
ރާއްޖެއިން ބޭރުގައި ކިޔަވާ ދަރިވަރުންނަށް ބީއެމްއެލްގެ ޑޮލަރު ލިމިޓް 1،200 އަށް ބޮޑުކޮށްދިނުމަށް ވަޒީރުންގެ މަޖިލީހުގެ ލަފާފުޅާއެކު ރައީސް ނިންމެވީ މިދިޔަ ޑިސެމްބަރު 24 ވަނަ ދުވަހު އެވެ. ނަމަވެސް އިއްޔެއާ ހަމައަށް އެ ނިންމުން އޮތީ ތަންފީޒު ނުކޮށެވެ.
ސަރުކާރުގެ ބަޔާނުގައި ބުނެފައިވަނީ ދިވެހި ގައުމުގެ ތަރައްގީގައި އަދި ރައްޔިތުންގެ ފުދުންތެރިކަން އިތުރުކޮށްދީ، މާލީ މުއާމަލާތްތައް ފަސޭހަކޮށްދިނުމުގައި ބީއެމްއެލްގެ ދައުރު ފުޅާކުރުމަށް ސަރުކާރުން އަބަދުވެސް ވާގިވެރިވަމުން ދާނެ ކަމުގެ ޔަގީންކަން ރައްޔިތުންނަށް އަރުވާ ކަމަށެވެ. އަދި ދައުލަތުގެ ހަރަދުތައް ކުޑަކޮށް، ދަރަނި ކުޑަކޮށް، ދައުލަތަށް ލިބޭ އާމުދަނީގެ މަންފާ ރައްޔިތުންނަށް އިތުރުވަމުންދާނެ ތިޔާގި ދުވަސްތަކެއް ގައުމަށް ހޯދައިދިނުމަށް ސަރުކާރުން އަޅަން ފަށާފައިވާ އިސްލާޙީ ފިޔަވަޅުތައް ހަރުދަނާކަންމަތީ ދެމެހެއްޓުމަށް ސަރުކާރުން އަބަދުވެސް އިސްކަންދޭނެ ކަމަށްވެސް ބަޔާނުގައި ބުނެފައިވެ އެވެ.
ބީއެމްއެލްގެ ދިވެހި ރުފިޔާ އެކައުންޓްތަކުން އެމެރިކާ ޑޮލަރުގެ މުއާމަލާތް ނުކުރެވޭ ގޮތް ހަދައި އަދި ކްރެޑިޓް ކާޑުތަކުން މަހެއްގެ މައްޗަށް ކުރެވޭ ރާއްޖޭން ބޭރުގެ މުއާމަލާތްތައް 100 ޑޮލަރަށް ދަށްކުރުމަށް ބީއެމްއެލް އިން މިދިޔަ އޮގަސްޓް މަހުގެ 25 ވަނަ ދުވަހުގެ ހެނދުނު ވަރަށް ކުއްލި ގޮތަކަށް ނިންމި އެވެ. ނަމަވެސް އާންމު ރައްޔިތުން ނުރުހުމާއި ފާޑުކިޔުންތަކާ ގުޅިގެން އަދި ސަރުކާރުގެ ފިއްތުއްތަކާ އެކު ބީއެމްއެލްގެ އެ ނިންމުން ވަނީ އެ ދުވަހުގެ މެންދުރުފަހު ބާތިލްކޮށް ކުރިންވެސް އަމަލުކުރަމުން ދިޔަ އުސޫލުން އަމަލުކުރަން ފެށި އެވެ.
ބީއެމްއެލްގެ އޮގަސްޓް މަހުގެ އެ ނިންމުން އެއީ ސަރުކާރާ ދެކޮޅަށް އެ ބޭންކުން ހިންގި ބަޣާވާތެއް ކަމަށް ރައީސް މުއިއްޒު އޮތީ އޭރު ވިދާޅުވެފަ އެވެ. އަދި އެ މައްސަލައިގައި ޖިނާއީ ތަހުގީގެއްވެސް ފުލުހުން ފެށި އެވެ. ނަމަވެސް މައްސަލައިގެ ތުހުމަތުގައި އެއްވެސް މީހަކާ އަދި މިހާތަނަށް ފުލުހުން ސުވާލުކޮށްފައެއް ނުވެ އެވެ.