ރާއްޖޭގައި ބާއްވާ އެންމެ ބޮޑު ދުވުން ދިރާގު މޯލްޑިވްސް ރޯޑް ރޭސް މާދަމާ އޮންނާނެ އެވެ.
ދެ ދަންފަޅިއަކަށް ބަހާލައިގެން ކުރިއަށް ގެންދާ މި ދުވުމުގެ ފުރަތަމަ ދަން ފަޅީގެ ދުވުން ފަތިހު ފަހެއް ޖަހާއިރު ފަށާއިރު، ފުރަތަމަ އޮންނާނީ ހާފް މެރެެތަން އާއި 10 ކިލޯމީޓަރުގެ ދުވުމެވެ.
ދެވަނަ ދަންފަޅީގައިއޮންނަނީ ފަސް ކިލޯމީޓަރުގެ ދުވުމާއި ހުރިހާ ކެޓަގަރީއަކުން ހުރިހާ ބައިވެރިންގެ ދުވުމެވެ. މިދަންފަޅީގެ ދުވުން އޮންނާނީ ހަވީރު ހަތަރަކުން ހަޔަކަށެވެ.
މި އަހަރު އަލަށް ތައާރަފް ކުރި އޮފީސް އަދި ރިސޯޓް ކެޓަގަރީގެ ދުވުން ވެސް އޮންނާނީ މި ދަންފަޅީގަ އެވެ.
ދުވުމުގެ ފޯރި އިތުރު ކުރުމުގެ ގޮތުން ދުވުން ކުރިއަށްދާ ވަގުތުގައި ކާބޯތަކެތި ލިބޭނެ އިންތިޒާމު ހަމަޖައްސައި ދިނުމުގެ ގޮތުން ދިރާގުން ވަނީ ވިމެން އެންޓްރަޕްރިނިއާސް އެސޯސިއޭޝަން މޯލްޑިވްސް (ވިއަމް)އާ ޕާޓްނާޝިޕެއްގެ ދަށުން އެ ސަރަހައްދުން ކާބޯތަކެތި ލިބޭނެ އިންތިޒާމު ހަމަޖައްސާފަ އެވެ.
ދިރާގު ރޯޑް ރޭހަކީ ރާއްޖޭގައި ބާއްވާ ހަމައެކަނި ބައިނަލްއަގުވާމީ ދުވުމެވެ. ދިރާގުން މި ދުވުން ބާއްވަން ފެށީ 2007 ވަނަ އަހަރު އެވެ. މިއީ މި ދުވުން ބާއްވާ 15 ވަނަ އަހަރެވެ.
ދިރާގު ރޯޑް ރޭހުގެ ހަރަކާތްތައް ކުރިއަށް ދާނީ ހުޅުމަލޭ ސެންޓްރަލް ޕާކު ސަރަހައްދު ގައެވެ.