މަތީ ތައުލީމާއި ވަޒީފާގެ ފުރުސަތުތަކާއި ގުޅޭ މައުލޫމާތު ފޯރުކޮށްދިނުމަށް ބާއްވާ "ދާލަން" އެކްސްޕޯގެ އެކްސްކްލޫސިވް ޑިޖިޓަލް ޕާޓްނަރަކަށް ދިރާގު ހަމަޖައްސައި އެއްބަސްވުމުގައި ސޮއިކޮށްފި އެވެ.
މި އެކްސްޕޯ އޮންނާނީ މިމަހުގެ 15 އަދި 16 ވަނަ ދުވަހު ހުޅުމާލެ، ސެންޓްރަލް ޕާކްގަ އެވެ.
ސަރުކާރުގެ މިނިސްޓްރީތަކާއި އިދާރާތަކާއި އެކި ކުންފުނިތަކުގެ އިތުރުން ޔުނިވާސިޓީތަކާއި ކޮލެޖްތަކާއި މަތީ ތައުލީމް ފޯރުކޮށްދޭ ތަންތަނުން މި އެކްސްޕޯގައި ބައިވެރިވާއިރު ކެރިއަ ގައިޑެންސް އާއި މަތީ ތައުލީމުގެ ފުރުސަތުތަކާއި ހުނަރު ތަރައްގީ ކުރުމުގެ ފުރުސަތުތަކުގެ މައުލޫމާތު މި އެކްސްޕޯ އިން ލިބޭނެ އެވެ.
ދިރާގުން ބުނި ގޮތުގައި ޒުވާނުން ބާރުވެރިކޮށް، ކުރިއަށް ދިއުމަށް މަގުފަހިކޮށްދިނުމަކީ އެ ކުންފުނީގެ ކޯޕަރޭޓް ސޯޝަލް ރެސްޕޮންސިބިލިޓީ (ސީއެސްއާރު) ގައި ހާއްސަ ސަމާލުކަމެއްދޭ ދާއިރާއެކެވެ.
މި ޕާޓްނާޝިޕްއަކީ ހުނަރާއި، އިނޮވޭޝަން، އަދި ކުރިއެރުން އާލާކޮށް، ރާއްޖޭގެ އިޖުތިމާއީ، އިގްތިސާދީ ތަރައްގީއަށް ހިއްސާކުރުމަށް ދިރާގުން ކުރާ މަސައްކަތް ހާމަކޮށްދޭ ޕާޓްނާޝިޕްއެއް ކަމަށްވެސް އެ ކުންފުނިން ބުނެ އެވެ.
ދިރާގުން ބުނީ ދާލަން އެކްސްޕޯގައި ހުންނަ އެ ކުންފުނީގެ ސްޓޯލުން ދިރާގުގައި ހުރި ވަޒީފާގެ ފުރުސަތުތަކުގެ އިތުރުން އެޕްރެންޓިސްޝިޕް ޕްރޮގްރާމްގެ މައުލޫމާތު ލިބޭނެ ކަމަށެވެ.
ޒުވާނުން ބާރުވެރިކޮށް ރާއްޖޭގެ މުހިންމު ދާއިރާތައް ތަރައްގީކުރުމުގައި އެހީތެރިވެދީ، ދިވެހިންގެ ދިރިއުޅުން މުއްސަނދިކޮށްދޭ ހަރަކާތްތަކުގައި ބައިވެރިވެ އަބަދުވެސް އެއްބާރުލުން ދޭނެ ކަމަށް ދިރާގުން ބުނެ އެވެ.