ދެކުނުގެ ރަށެއްގައި ހާއްސަ އެހީއަށް ބޭނުންވާ މީހަކު ރޭޕް ކުރި މައްސަލަ އަލުން ބަލަން ހައިކޯޓުން އަމުރުކޮށްފި އެވެ.
މިއީ 2018 ވަނަ އަހަރުގެ ތެރޭގައި ހުވަދު އަތޮޅު ރަށެއްގައި ހިނގި ރޭޕުގެ މައްސަލަ އެކެވެ.
މި މައްސަލައިގައި އެ ހާދިސާ ހިނގި ރަށުގެ ކޯޓުން ވަނީ މައްސަލަ ކުރިއަށް ނުގެންދެވޭނެ ކަމަށް ކަނޑައަޅައި މައްސަލަ ބޭރުކޮށްލާފަ އެވެ.
ދަށު ކޯޓުން މައްސަލަ ބޭރުކޮށްލުމުން މައްސަލަ ހައިކޯޓުގައި އިސްތިއުނާފު ކުރީ ދައުލަތުންނެވެ.
މިމައްސަލައިގައި ހައިކޯޓުގެ ފަނޑިޔާރުންގެ އިއްތިފާގުން މިއަދު ހުކުމް ކުރީ މި މައްސަލައަކީ ފައިސަލާ ކުރަނިވި ހުކުމެއް ކުރަން ޖެހޭ މައްސަލައެއް ކަމަށެވެ.
ހައިކޯޓުން މި މައްސަލަ ދަށު ކޯޓަށް އަލުން ފޮނުވާލީ، އެ ކޯޓުން މި މައްސަލަ ބަލައި ގޮތެއް ކަނޑައަޅަން ޖެހޭ ކަމަށް އަމުރުކޮށްފަ އެވެ.
މި މައްސަލައަކީ އާއްމު އިޖުތިމާއީ މިންގަނޑާ ހިލާފު ވާހަކަތައް ހިމެނޭ އަދި އަނިޔާ ލިބުނު ފަރާތުގެ މަސްލަހަތުގައި ސިއްރުކުރަންޖެހޭ ކަންތައްތަކެއް ހުރި މައްސަލައަކަށްވާތީ ސިއްރުން ކުރިއަށް ގެންދިޔަ މައްސަލަ އެކެވެ.