އދގެ ސެކްރެޓަރީ ޖެނެރަލް އެންޓޯނިއޯ ގުޓަރެސް ޔުކްރޭނަށް ކުރައްވަން އޮތް ދަތުރު ކެންސަލުކުރަން ޖެހިވަޑައިގެންފި އެވެ. އެއީ މި ދަތުރަށް ޔުކްރޭނުން ހުއްދަ ނުދިނުމުގެ ސަބަބުންނެވެ.
ރިޕޯޓްތައް ބުނާ ގޮތުން ޔުކްރޭންގެ ރައީސް ޒެލެންސްކީ ވަނީ ސެކްރެޓަރީ ޖެނެރަލަށް ހުއްދަ ނުދެއްވުމަށް ނިންމަވާފަ އެވެ. އެއީ ރަޝިއާގައި އޮތް ބްރިކްސް ސަމިޓްގައި އެންޓޯނިއޯ ގުޓަޓެސް ބައިވެރިވެވަޑައިގަތުމުންނެވެ.
ސެކްރެޓަރީ ޖެނެރަލްގެ ދަތުރު ތާވަލްގައި ރަޝިއާއަށްފަހު އޮތީ ޔުކްރޭން އެވެ. އޭނާ ރަޝިއާގައި، ރަޝިއާގެ ރައީސް ލަޑިމިއާ ޕޫޓިންއާ ބައްދަލުކުރަައްވައި ޔުކްރޭން ހަނގުރާމައާ ބެހޭ ގޮތުން މަޝްވަރާކުރެއްވި އެވެ.
ރަޝިއާގެ ކަޒާން ސިޓީގައި އޮތް ބްރިކްސް ސަމިޓްގައި -- ސަމިޓުގެ ބައިވެރިންނާ މުހާތަބުކުރައްވައި، އަދި ބްރިކްސްގެ ވެރިން ޕޫޓިން ވެސް ހިމެނޭ ގޮތުން -- ސެކްރެޓަރީ ޖެނެރަލް ވަނީ ޔުކްރޭން ހަނގުރާމަ ހުއްޓާލުމަށް އެދިވަޑައިގެންފަ އެވެ.
ސެކްރެޓަރީ ޖެނެރަލް ރަޝިއާގެ ރައީސްއާ ބައްދަލުކުރައްވައި ޔުކްރޭންގެ މަސްލަހަތަށްޓަކައި ބަސްވިދާޅުވި ނަމަވެސް -- ޔުކްރޭން ގަބޫލުކުރާ ގޮތުން އދގެ ސެކެރެޓަރީ ޖެނެރަލް ރަޝިއާއަށް ވަޑައިގަތުމަކީ ވެސް ގޯހެކެވެ.
އެންޓޯނިއޯ ގުޓަރެސްއަށް ޔުކްރޭނުން ހުއްދަނުދިނީ މި ރުޅިގަނޑުގައި ކަމަށް ޚަބަރުތައް ބުނެ އެވެ.
ރަޝިއާގެ ކަޒާންގައި، ޕޫޓިންއާ މަޝްވަރާކުރައްވަމުން ސެކްރެޓަރީ ޖެނެރަލް ވަނީ އދގެ ގަވާއިދުތަކާ ބެހޭ ގޮތުން ވިދާޅުވެފަ އެވެ. ސެކްރެޓަރީ ޖެނެރަލް ވިދާޅުވީ އަސްކަރީ ގޮތުން ޔުކްރޭނަށް އަރައިގަތުމަކީ ރަޝިއާ ހަދާފައި އޮތް ގޯހެއް ކަމަށެވެ.
ހަނގުރާމަ ހުއްޓާލައި ޔުކްރޭންއާ ސުލްހަވުމަށް ހަރަކާތްތައް ފެށުމަށް ސެކްރެޓަރީ ޖެނެރަލް އެދިވަޑައިގެންނެވި އެވެ.