އައްޑޫގައި އަންނަ އަހަރުގެ ތެރޭގައި ޓޫރިޒަމް ސިމްޕޯޒިއަމްއެއް ބޭއްވުމަށް ނިންމައިފި އެވެ.
ސަރުކާރުގެ ފަރާތުން މިކަން އިއުލާންކުރެއްވީ އައްޑޫގެ ޓޫރިޒަމް ބްރޭންޑް ލޯންޗު ކުރުމަށް ރޭ ކެނަރީފް ރިސޯޓުގައި ބޭއްވި ރަސްމިއްޔާތުގައި ޓޫރިޒަމް މިނިސްޓަރު އިބްރާހީމް ފައިސަލް އެވެ.
ފައިސަލް ވިދާޅުވީ އައްޑޫ ރައްޔިތުންނަށް މިވަގުތު އެންމެ މުހިއްމީ އައްޑޫގައި ހުރި ޓޫރިޒަމްގެ ތަންތަން ރަނގަޅަށް ހިންގުން ކަމަށާއި އަދި ޓޫރިޒަމްގައި ހުރި ފުރުސަތުތައް ވަކިން ހާއްސަކޮށް ވަޒީފާގެ ފުރުސަތުތައް ކިޔައިދިނުން ކަމަށެވެ.
"އެހެންވެ އަންނަ އަހަރު އައްޑޫގައި ޓޫރިޒަމް ސިމްޕޯޒިއަމެއް ބާއްވަން މިހާރު ވަނީ ނިންމާފައި. މިކަން ލީޑް ކުރާނީ އެމްއެމްޕީއާރްސީ އިން،" ފައިސަލް ވިދާޅުވި އެވެ.
އޭނާ ވިދާޅުވީ އައްޑޫގައި ބާއްވާ ސިމްޕޯޒިއަމްގައި ޗައިނާ އާއި އިންޑިއާގެ އެއާލައިންތަކާއި ޓުއާ އޮޕަރޭޓަރުންނާއި އޮންލައިން ބުކިން ޕްލެޓްފޯމްތައް ބައިވެރިކުރާނެ ކަމަށެވެ.
ފައިސަލް ވިދާޅުވި ގޮތުގައި މިވަގުތު އައްޑޫގައި ފަތުރުވެރިންނަށް ހުރީ 1،000 އެނދެވެ.
މިނިސްޓަރު އިތުރަށް ވިދާޅުވީ އައްޑޫ ގަން އިންޓަނޭޝަނަލް އެއާޕޯޓް ހިންގާ ކުންފުނީގައި ހިއްސާ އޮންނަ ކާސާ ހޯލްޑިންސް އިން އައްޑޫގައި 130 އެނދުގެ ހޮޓަލެއް އަޅަން ބޭނުންވާ ކަމަށެވެ.
"މިކަމަށް މަގުފަހިކުރަން ކުރަންޖެހޭ ކަންކަން ސަރުކާރުން ކުރަމުންދާނެ،" ފައިސަލް ވިދާޅުވި އެވެ.