ސަރުކާރުގެ މައި ހޮސްޕިޓަލް -- އައިޖީއެމްއެޗްގައި ފާޓިލިޓީ ސެންޓަރު ގާއިމްކޮށް މިއަހަރު އައިވީއެފް ހެދުމުގެ ހިދުމަތް ފެށުމަށް ތައްޔާރުވެއްޖެ އެވެ.
މާލެ ހޮސްޕިޓަލްސް ގްރޫޕުން މިދިޔަ ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި އެ ގުރޫޕްގެ ސީއީއޯ އިބްރާހިމް އަބްދުއްރައްޒާގް ހަލީމް ވިދާޅުވީ އައިޖީއެމްއެޗްގައި ފާޓިލިޓި ސެންޓަރު ހަދާ މިއަހަރު ތެރޭގައި ހިދުމަތް ދޭން ފަށާނެ ކަމަށެވެ.
ހަލީމް ވިދާޅުވީ ދަރިމައިވުމުގެ މައްސަލަތަކަކީ ރާއްޖޭގައި ގިނަ ބަޔަކު ފަރުވާއަށް ބޮޑު ހޭދައެއްކޮށް ރާއްޖެ އިން ބޭރުން ހިދުމަތް ހޯދަން ޖެހިފައިވާ ގިނަ ބަޔަކު ވަރަށް ބޮޑު ކަންބޮޑުވުމެއްވެސް ތަހައްމަލް ކުރާ މައްސަލައެއް ކަމަށެވެ.
"މި ސެންޓަރަކީ އައިވީއެފް ހެދޭނެ ގޮތަށް ބޭނުންވާ ހުރިހާ އިކުއިޕްމަންޓާއި ވަސީލަތްތަކާއެކީގައި ގާއިމުކުރާ ފާޓިލިޓި ސެންޓަރެއް،" ހަލީމް ވިދާޅުވި އެވެ.
އޭނާ ވިދާޅުވީ އިންޑިއާގެ އެންޔޫ ހޮސްޕިޓަލާ ގުޅިގެން މިހާރުވެސް ނެޝަނަލް ޔޫރޯ ރީނަލް އެންޑް ފާޓިލިޓީ ސެންޓަރުގައި ފަރުވާ ދެމުން އަންނަ ކަމަށާއި ނަމަވެސް އެކަށިގެންވާ ގޮތަކަށް އަދި ފަރުވާ ނުދެވޭ ކަމަށެވެ.
ނޫސްވެރިންގެ ބައްދަލުވުމުގައި ދަރުމަވަންތަ ހޮސްޕިޓަލްގެ ޑެޕިއުޓީ ސީއީއޯ ޑރ. ޝާހު މާހިރު ވިދާޅުވީ ބޭނުންވަނީ ބޭރުގެ ފަރާތްތަކަށް ބަރޯސާވެގެން ކުރާ މަސައްކަތްތައް ވީހާވެސް މަދުކޮށް އަމިއްލައަށް ކުރާ މަސައްކަތް އިތުރުކޮށްގެން ކުރިއަށް އޮތް ތަނުގައި ރާއްޖޭގައި ގިނަ ހިދުމަތްތަކެއް ފަށަން ކަމަށެވެ.
"އެދެވޭ ގޮތެއްގައި މިހާތަނަށް ފާޓިލިޓީ ހިދުމަތް ފުޅާކުރުމުގެ މަސައްކަތް ނުކުރެވޭ. އެހެންވެ ބަޔަކާ ނުގުޅި އައިޖީއެމްއެޗްގެ އަމިއްލަ މަރުކަޒެއް ހަދަނީ\،" ޑރ. ޝާހު ވިދާޅުވި އެވެ.
ރާއްޖޭގެ އަމިއްލަ ހޮސްޕިޓަލެއް ކަމަށްވާ ޓްރީ ޓޮޕް ހޮސްޕިޓަލްގައި މިދިޔަ އަހަރު ވަނީ އައިވީއެފް ހެދުމުގެ ހިދުމަތް ފަށާފަ އެވެ.