ސްޓޭޓް އިލެކްޓްރިކް ކޮމްޕެނީ (ސްޓެލްކޯ) ގެ ސްޓްރެޓީޖިކް އެކްޝަން ޕްލޭން މިއަދު އިފްތިތާހުކޮށްފި އެވެ.
ސްޓެލްކޯއިން އެކުލަވާލާފައިވާ ސްޓްރެޓީޖިކް ޕްލޭންއަކީ ކުރިއަށް އޮތް ފަސް އަހަރުގެ މުއްދަތުގައި ހާސިލުކުރަން ބޭނުންވާ ކަންކަން ހިމަނައިގެން ހަދާފައިވާ ޕްލޭނެކެވެ. މިއީ ރާއްޖޭގެ ތަރައްގީއާ އެއް ހަމައެއްގައި ކަރަންޓު އަދި ނަރުދަމާ ނިޒާމު ބެހެއްޓުމަށް ކުރެވޭނެ މަސައްކަތްތައް ކުރުމަށް ލިބޭ އެހީއެކެވެ.
މި ޕްލޭން އިފްތިތާހުކޮށްދެއްވާފައިވަނީ ޕްލޭންގެ މަސައްކަތް ވެސް ފެއްޓެވި އެ ކުންފުނީގެ މެނޭޖިން ޑިރެކްޓަރު ހުސެއިން ފަހުމީ އެވެ.
ޕްލޭން އިފްތިތާހުކުރި ރަސްމިއްޔާތުގައި ވާހަކަދައްކަވަމުން ފަހުމީ ވިދާޅުވީ މީގެ ސަބަބުން ކުންފުނީގެ ހިންގުން އިތުރަށް ހަރުދަނާވެގެން ދާނެ ކަމަށެވެ.
ޕްލޭން އެކުލަވާލުލިއިރު ސްޓެލްކޯއިން ދޭ ހިދުމަތްތައް ރަނގަޅުކުރެވޭނެ ގޮތްތަކާއި ރައްޔިތުންގެ އިތުބާރު ހިފެހެއްޓުމަށް އިސްކަންދީފައިވާ ކަމަށް އެ ކުންފުނިން ބުންޏެވެ. އެގޮތުން ޕްލޭންގައި ފަސް ސްޓްރެޓީޖިކް އޮބްޖެކްޓިވް، 19 ސްޓްރެޓިޖިކް ގޯލް، 55 ޓާގެޓް އަދި 96 އެކްޝަން ހިމަނާފައިވެ އެވެ.
ސްޓެލްކޯއިން ބުނީ އެ މަސައްކަތުގައި ކުންފުނީގައި އުޅޭ ކަމާބެހޭ ދާއިރާތަކުގެ އިސްވެރިން، ޔުނިޓް ހެޑުން އަދި ދަށުން މަސައްކަތްކުރާ މުވައްޒަފުންގެ ޓީމެއް ވެސް ބައިވެރިވި ކަމަށެވެ.