ސްޓެލްކޯ އިން ތައްޔާރުކުރާ ކަރަންޓު ބިލްގައި މައްސަލައެއް އުޅޭނަމަ އެ މައްސަލައެއް ހައްލުކޮށް ދޭނެ ކަމަށް އެ ކުންފުނިން ބުނެފި އެވެ.
ސްޓެލްކޯ އިން ބުނީ އެ ކުންފުނީގެ ހިދުމަތުގައި 75 އަހަރު ވެފައިވާއިރު މުއައްޒަފުންގެ މަސައްކަތް ކުރަމުން ގޮސްފައިވަނީ މަސައްކަތުގެ އަހުލާގު ހިފަހައްޓައިގެން ތަނުގެ ގަވާއިދާއި އުސޫލުތަކުގެ ތެރެއިން ކަމަށެވެ.
ސްޓެލްކޯއިން ބުނީ ރައްޔިތުންނަށް ކަރަންޓް އުފައްދާ ހިދުމަތް ފޯރުކޮށްދިނުމުގެ މަސައްކަތުގައި 24 ގަޑިއިރު ކުރާ ބުރަ މަސައްކަތަކީ ޒިންމާދާރު ކަމާއެކު އެ ކުންފުނީގެ މުއައްޒަފުން ކުރާ ބުރަ މަސައްކަތެއް ކަމަށެވެ. ކޮންމެ މަހަކު ގޭގެއަށް ގޮސް ރީޑިން ނަގައި، ކުންފުނީގެ އުސޫލުތަކާ އެއްގޮތަށް ކުންފުނީގެ މުއައްޒަފުން ބިލްތައް ތައްޔާރުކުރަމުން ދަނީ ތަނުގެ ގަވައިދުތަކާއި އެއްގޮތަށް ކަމަށްވެސް ބުންޏެވެ.
ސްޓެލްކޯ އިން ބުނީ ކަރަންޓް ރީޑިން ނެގުމުގައި އެކުންފުނީގެ ގަވާއިދުތަކާއި އުސޫލުތަކާ ހިލާފަށް އެއްވެސް ކަމެއް ނުކުރާނެ ކަމުގެ ޔަގީންކަން ރައްޔިތުންނަށް ދޭ ކަމަށެވެ. އަދި ކުންފުނިން ކަސްޓަމަރުންނަށް ދޭން ބޭނުންވާ އިތުބާރާއި، ޔަގީންކަމަކީ ކުންފުނިން ރީޑިން ނެގުމާއި ނުލައި އަދި ކަސްޓަމަރުން ބޭނުން ނުކުރާ ކަރަންޓަށް ބިލް ނުފޮނުވާނެ ކަމުގެ ޔަގީންކަން ރައްޔިތުންނަށް ދޭ ކަމަށްވެސް ބުންޏެވެ.
ކުންފުނީގެ މުއައްޒަފުންނަކީވެސް އެހެން ކަސްޓަމަރުންނެކޭ އެއްގޮތަށް ބިލް ކުރެވޭ ބައެއްކަން ފާހަގަކޮށް، ސްޓެލްކޯއިން ބުނީ
އެ ނޫން އުސޫލަކުން ބިލް ކުރަމުންދޭތޯ ބެލުމަށް ކަމާ ގުޅުންހުރި އެންމެހާ މުއައްސަސާތަކަށާއި އެންމެހާ ފަރާތްތަކަށް އެކަން ބަލައި ދިނުމަށް ދައުވަތު އަރުވާ ކަމަށެވެ.
އެކުންފުންޏާ ދޭތެރޭ ރައްޔިތުންގެ ހިތުގައި އޮތް އިތުބާރު ދެމެހެއްޓުމަށް، މުއައްޒަފުން ކުރަމުންދާ އިހްލާސްތެރި މަސައްކަތްތައް ފަހުރުވެރިކަމާއި އެކު ޝުކުރު އަދާކުރާ ކަމަށްވެސް ސްޓެލްކޯ އިން ބުންޏެވެ.
ސްޓެލްކޯ އިން އިތުރަށް ބުނީ ކަރަންޓް ރީޑިން ނެގުމުގައި ގަވާއިދާ ހިލާފަށް އަމަލު ކުރަމުންދާ ކަމަށް ބުނެ ބައެއް ފަރާތްތަކުން އަޑު ފަތުރަމުންދާތީ ހިތާމަކުރާ ކަމަށެވެ. އަދި ރައްޔިތުންގެ މެދުގައި އޮތް ކުންފުނީގެ ތަސައްވުރު ކިލަނބުވާ ގޮތަށް ޒިންމާދާރުކަން ކުޑަ ވާހަކަތައް ފެތުރުމަކީ ކުންފުނިން ވަރަށް ހަރުކަށި އިބާރާތުން ކުށްވެރި ކުރާ ކަމެއް ކަމަށްވެސް ސްޓެލްކޯ އިން ބުނެފައިވެ އެވެ.