ރާއްޖޭގައި ވޭޕް އެތެރެކުރުން މަނާކުރުމަށް ރައްޔިތުންގެ މަޖިލީހަށް ހުށަހެޅި ބިލު ބަލައިގަނެ، ދިރާސާކުރުމަށް ކޮމިޓީއަށް ފޮނުވައިފި އެވެ.
ދިވެހި ސަރުކާރުގެ ފަރާތުން ވޭޕް އެތެރެކުރުން މަނާކުރުމުގެ ބިލު ހުށަހެޅީ ހެންވޭރު އުތުރު ދާއިރާގެ މެމްބަރު އަހުމަދު އައިފާން އެވެ. ބިލަށް ބަހުސްކުރުމަށްފަހު ބިލު ބަލައިގަނެފައިވަނީ ވޯޓުގައި ބައިވެރިވި 77 މެމްބަރުންގެ ތެރެއިން 76 މެމްބަރުންގެ ވޯޓުންނެވެ.
ހުޅުމާލޭ ދެކުނު ދާއިރާގެ މެމްބަރު ޑރ. އަހްމަދު ޝަމްހީދު ވަނީ ވަކި ގޮތަކަށް ނުފެންނަ ކަމަށް ވޮޓު ދެއްވާފަ އެވެ.
ބިލު ދިރާސާކުރުމަށް ފޮނުވާފައިވަނީ އިޖުތިމާއީ ކޮމިޓީ އަށެވެ. ކޮމިޓީއަށް ބިލު ދިރާސާކުރުމަށްފަހު އަނބުރާ މަޖިލީހުގެ ތަޅުމަށް ފޮނުވުމަށް އެއް ދުވަސް ދިނުމަށް ރައްޔިތުންގެ މަޖިލީހުން ވަނީ ފާސްކޮށްފަ އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު މި މަހުގެ 14 ވަނަ ދުވަހު ވިދާޅުވީ ވޭޕްކުރަން ބޭނުންކުރާ ތަކެއްޗާއި އޭގެ ވަކިވަކި ބައިތައް ކުރިއަށް އޮތް ނޮވެމްބަރު މަހުގެ 15 ވަނަ ދުވަހުން ފެށިގެން ރާއްޖެ އެތެރެކުރުން މަނާކުރަން ނިންމާފައިވާ ކަމަށެވެ. އަދި އެފަދަ ތަކެތި މިއަހަރުގެ ޑިސެމްބަރު 15 ވަނަ ދުވަހުން ފެށިގެން އިޝްތިހާރު ކުރުން މަނާކުރުމަށްވެސް ރައީސް ވަނީ އަންގަވާފަ އެވެ.
ވޭޕް މަނާކުރުމަށް ކަނޑައަޅާފައިވާ ތާރީހަށްފަހު ވޭޕްއަށް ބޭނުންވާ އާލާތްތައް އެތެރެކޮށްފިނަމަ 50،000 ރުފިޔާއިން ޖޫރިމަނާ ކުރެވޭނެ އެވެ. އަދި ވޭޕް ކުރުމަށް ބޭނުންވާ ކޮންމެ އާލާތަކަށް 10،000 ރުފިޔާއިން ޖޫރިމަނާ ކުރެވޭނެ އެވެ.
ވޭޕްގެ އާލާތެއް ވިއްކައިފިނަމަ 20،000 ރުފިޔާއިން ޖޫރިމަނާކޮށް، ވިއްކާ ކޮންމެ އާލާތަކަށް 10،000 ރުފިޔާއިން ޖޫރިމަނާކުރެވޭނެ ވެސް ވަނީ ނިންމާފަ އެވެ. އޭގެ އިތުރުން ވޭޕް ބޭނުންކުރާނަމަ 5،000 ރުފިޔާއިން ޖޫރިމަނާ ކުރެވޭނެ އެވެ.