އިންޓަނެޓް ބޭނުންކުރާއިރު ރައްކާތެރިކަން ކަށަވަރުކޮށްދިނުމުގެ ގޮތުން ދިރާގުން "ނެޓް ޕްރޮޓެކްޓް" މިއަދު ތައާރަފްކޮށްފި އެވެ.
ދިރާގުން ބުނީ މި ހިދުމަތާއެކު ރައްކާތެރި ނޫން ވެބްސައިޓްތަކާއި ލިންކުތަކާއި ސްކޭމް އީމެއިލްތަކާއި ރަނގަޅު ނޫން ވެބްސައިޓްތަކުން ދޭ ގެއްލުންތަކުން ރައްކާތެރިކަން ހޯދޭނެ ކަމަށެވެ.
ކަސްޓަމަރަކު މި ހިދުމަތް ހޯދުމުން ރައްކާތެރި ނޫން ވެބްސައިޓާއި ލިންކްތައް ރައްކާތެރި ނޫންކަން ކަސްޓަމަރުންނަށް އަންގާނެ ކަމަށް ދިރާގުން ބުނެ އެވެ. މިހިދުމަތުގެ ތެރެއިން ބައެއް ވެބްސައިޓްތައް ބްލޮކް ކުރުމުގެ އިހުތިޔާރުވެސް ލިބޭނެ އެވެ.
ދިރާގުން ބުނީ ވަކި ވަގުތުތަކެއްގައި ވަކި ވެބްސައިޓްތަކަކަށް ނުވަތަ އެޕްލިކޭޝަންތަކަކަށް ނުވަދެވޭ ގޮތް ހަދައި ކުޑަކުދިންނަށް ފެންނަން ބޭނުންނުވާ ވެބްސައިޓްތައްވެސް މި ހިދުމަތުގެ ތެރެއިން ބްލޮކް ކުރާނެ ކަމަށެވެ. އެހެންވެ މިހިދުމަތަކީ ބެލެނިވެރިންނަށް ދަރިންގެ ރައްކާތެރިކަން ކަށަވަރު ކުރެވި ހިތްހަމަޖެހުންތަކެއް ހޯދައިދޭނެ ހިދުމަތެއް ކަމަށް ދިރާގުން ދެކެ އެވެ.
މޯބައިލް އިންޓަނެޓް އަދި ފިކްސްޑް ބްރޯޑްބޭންޑަށްވެސް ލިބޭ މި ހިދުމަތް ކަސްޓަމައިޒް ކުރެވޭނީ ޕްރޮޓެކްޓް ޕޯޓަލްއިން އެކަންޏެވެ.
މި ހިދުމަތް މިހާރު ނަގާނަމަ 30 ދުވަހަށް ހިލޭ ހިދުމަތް ލިބޭނެ އެވެ. ދިރާގުގެ ޕޭރަންޓަލް ކޮންޓްރޯލް ސާވިސް ނަގާފައިވާ ފަރާތްތައް ނެޓް ޕްރޮޓެކްޓަށް ބަދަލުކޮށްފައިވާ ކަމަށާއި އެ ފަރާތްތަކަށް 50 ޕަސެންޓްގެ ޑިސްކައުންޓެއް މުޅި އަހަރު ދުވަހަށް ލިބޭނެ ކަމަށްވެސް ދިރާގުން ބުންޏެވެ.
މި ހިދުމަތް އެކްޓިވޭޓްކޮށް ބޭނުންކުރަން މޯބައިލް ކަސްޓަމަރުން މަހަކު 35 ރުފިޔާ ދައްކަން ޖެހެ އެވެ. އަދި ފިކްސްޑް ބްރޯޑްބޭންޑް ކަސްޓަމަރުން މަހަކު 50 ރުފިޔާ ދައްކަން ޖެހެ އެވެ.