ތިމާވެށްޓާ ރައްޓެހި ގޮތުގައި ކަރަންޓް ބޭނުންކުރުމުގެ މަގުސަދުގައި މަގޭ ސޯލާ ޕްރޮގްރާމްގެ ދަށުން ސޯލާ ހިދުމަތަށް އެދުމުގެ ފުރުސަތު ފެނަކަ ކޯޕަރޭޝަނުން ހުޅުވާލައިފި އެވެ.
ފެނަކައިން ބުނީ އެކުންފުނިން ހިދުމަތްދޭ ހުރިހާ ގޭބިސީއަކަށް ހުޅުވާލައިގެން ކުރިއަށް ގެންދާ މި ޕްރޮގްރާމުގައި ދޫކުރާނީ ތިން ކިލޯ ވޯޓާއި ފަސްކިލޯ ވޯޓުގެ ސިންގަލް ފޭސް އަދި ތްރީ ފޭސް ސިސްޓަމްތަކެއް ކަމަށެވެ.
ދޫކުރާ ސިސްޓަމްތަކުގެ ސައިޒް ކަނޑައަޅާނީ ނެޓް މީޓަރިން އުސޫލުގެ ދަށުން ފެނަކަ ކޯޕަރޭޝަނަށް ހުށައަޅާ ގޭބީސީތައް ސާވޭ ކުރުމަށްފަހު ކަމަށްވެސް އެ ކުންފުނިން ބުންޏެވެ.
މި ޕްރޮގްރާމްގެ ދަށުން ހަރުކޮށްދޭ ސޯލާ ސިސްޓަމްތަކަށް ފައިސާ ދެއްކުމަށް ދެ ގޮތެއް ކަނޑައަޅާފައިވެ އެވެ. އެގޮތުން އެއްފަހަރާ ފައިސާ ދައްކާ ހަލާސްކުރާ ގޮތަށް ނުވަތަ އިންސްޓޯލްމަންޓް އުސޫލުން 1، 3 ނުވަތަ 5 އަހަރަށް ބަހާލައިގެން ފައިސާ ދައްކާ ގޮތަށްވެސް ހަމަަޖައްސައިދީފައިވެ އެވެ.
މި ޕްރޮގްރާމްގެ ދަށުން ދޫކުރާ ސޯލާގެ އަގުތަކަކީ 3 ކިލޯވޯޓު ސިސްޓަމެއް 45,000 ރުފިޔާއަށް އަދި 5 ކިލޯވޯޓު ސިސްޓަމެއް 75,000 ރުފިޔާ އަށެވެ.
ހިދުމަތަށް އެދެވޭނީ މިކަމަށް ހާއްސަ ކުރެވިފައިވާ ޕޯޓަލް މެދުވެރިކޮށް ކަމަށްވެސް ފެނަކައިން ބުންޏެވެ.