އަހުމަދު ޝިޔާމް

ފަސް އަހަރުގެ ތެރޭގައި މަސް ރައްކާކުރެވޭ ކެޕޭސިޓީ 25،000 ޓަނަށް އިތުރުކުރަނީ

މި ސަރުކާރުގެ ފަސް އަހަރު ނިމޭއިރު މަސް ރައްކާކުރެވޭ ކެޕޭސިޓީ 25،000 ޓަނަށް އިތުރުކުރާނެ ކަމަށް ފިޝަރީޒް މިނިސްޓަރު އަހުމަދު ޝިޔާމް މިއަދު ވިދާޅުވެއްޖެ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރު ޝިޔާމް ވިދާޅުވީ މަސްވެރިކަމުގެ ސިނާއަތަށް އޮތް އެންމެ ބޮޑު ގޮންޖެހުމަކީ މަސް ރައްކާކުރުމުގެ ކެޕޭސިޓީ ނެތުން ކަމަށެވެ.

ފެލިވަރު އޮޕަރޭޝަނަށް އައިފަހުން 47 އަހަރުވެފައިވާއިރު ފެސިލިޓީ ފެށުނު ގޮތާއި މިއަދާއި މާ ބޮޑު ތަފާތެއް ނެތް ކަމަށް ޝިޔާމް ވިދާޅުވި އެވެ.

"މިއަދު ދިވެހިރާއްޖޭގެ ކެޕޭސިޓީ ސްޓޯރޭޖަކީ 8،500 ޓަނު،" ޝިޔާމް ވިދާޅުވި އެވެ.

މި ސަރުކާރު ވެރިކަމާ ހަވާލުވިއިރު މަސްވެރިންނަށް ނުދެވި ބެކްލޮގްގައި 250 މިލިއަން ރުފިޔާ ހުރިކަން ފާހަގަކުރައްވާ ޝިޔާމް ވިދާޅުވީ ރާއްޖޭގައި މިހާރު ހުރި ކެޕޭސިޓީގައި 250 މިލިއަން ރުފިޔާގެ މަސް ރައްކާ ނުކުރެވޭނެ ކަމަށެވެ.

"ދިވެހިރާއްޖޭގެ ސްޓޯރޭޖް ކެޕޭސިޓީ އިރާދަކުރެއްވިއްޔާ އަޅުގަނޑުމެންގެ ސަރުކާރު ނިމޭއިރު ހުންނާނީ 25،000 ޓަނަށްވުރެ މަތީގައި،" ޝިޔާމް ވިދާޅުވި އެވެ.

ޝިޔާމް ވަނީ އައްޑޫ ސިޓީ ފިޝަރީޒް ކޮމްޕްލެކްސް ތަރައްގީކުރުމުގެ މަސައްކަތް އަންނަ އަހަރު ކުރީކޮޅު ފެށޭނެ ކަމަށްވެސް ވިދާޅުވެފަ އެވެ.

އެ މަޝްރޫއަށް ފައިސާ ހަމަޖެހިފައިވާ ކަމަށާއި ކޮމްޕްލެކްސް ތަރައްގީ ކުރުމުގެ މަސައްކަތް އަންނަ އަހަރު ފަހުކޮޅު ނުވަތަ 2026 ވަނަ އަހަރުގެ ކުރީކޮޅު ނިންމާލެވޭނެ ކަމަށް މިނިސްޓަރު ވިދާޅުވި އެވެ.