މަސްވެރިންނަށް މިއަދާ ހަމައަށް ނުދީ ހުރި ފައިސާގެ ޖުމްލަ އަދަދު ދިނުމަށް މިފްކޯއާ ހަވާލުކޮށްފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
އެކްސްގައި ކުރެއްވި ޕޯސްޓެއްގައި ރައީސް މުއިއްޒު ވިދާޅުވީ ސަރުކާރުގެ މެނިފެސްޓޯގައިވާ ފަދައިން 48 ގަޑިއިރު ތެރޭގައި ދެމެހެއްޓެނިވި ގޮތެއްގައި ފައިސާ ދެވޭނޭ ނިޒާމު ގާއިމު ކުރުމުގެ މަސައްކަތް ކުރަމުންދާ ކަމަށެވެ.
ރައީސް މުއިއްޒު މިހެން ވިދާޅުވިއިރު މަސްވެރިން ކިރާ މަހަށް 48 ގަޑިއިރުގެ ތެރޭގައި ފައިސާ ދިނުމަކީ ސަރުކާރުގެ ވައުދެއް ކަމަށާއި އެއީ "ފިލާނެ ވައުދެއް" ނޫން ކަމަށް ފިޝަރީޒް މިނިސްޓަރު އަހުމަދު ޝިޔާމް މިއަދު ވަނީ ވިދާޅުވެފަ އެވެ.
މި ސަރުކާރު ހަވާލުވިިއިރު މަސްވެރިންނަށް 250 މިލިއަން ރުފިޔާ ނުދެވި ބެކްލޮގްގައި އޮތްކަން ފާހަގަކުރައްވާ މިނިސްޓަރު ޝިޔާމް ވިދާޅުވީ އެ ފައިސާ ދައްކާ ހަލާސްކޮށް މަސްވެރިންނަށް ދޭންޖެހޭ ފައިސާ މި ސަރުކާރުން ބަރާބަރަށް ދެމުންދާ ކަމަށެވެ.