މަސްވެރިންގެ ބުރަ މަސައްކަތުގެ އަގު ވަޒަން ކުރުމަކީ ގައުމީ ވާޖިބެއް ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރާއްޖޭގެ މަސްވެރިންގެ ދުވަހުގެ މުނާސަބަތުގައި މިއަދު އެކްސްގައި ކުރެއްވި ޕޯސްޓެއް ރައީސް މުއިއްޒު ވަނީ މަސްވެރިން ކުރާ މަސައްކަތް ފާހަގަކުރައްވާފަ އެވެ.
"އަތްވާއި ވާރޭގައި، ދުވާލާއި ރޭގަނޑު، ބިޔަ ކަނޑުތަކުގައި، ދިވެހި މަސްވެރިން ކުރާ ހިންމަތުގެ އަގު އިހްތިރާމާއެކު ވަޒަންކުރުމަކީ ގައުމީ ވާޖިބެކެވެ،" ރައީސް މުއިއްޒު ވިދާޅުވި އެވެ.
ރައީސް މުއިއްޒު މިހެން ވިދާޅުވިއިރު މަސްވެރިން މިފްކޯއަށް ކިރާ މަހަށް ގިނަވެގެން 48 ގަޑިއިރުގެ ތެރޭގައި މިއަދުން ފެށިގެން ފައިސާ ޖަމާވަމުންދާނެ ކަމުގައި އެމަނިކުފާނު އިއްޔެ އިއުލާނު ކުރެއްވި އެވެ.
ރައީސް މިކަން އިއުލާން ކުރެއްވީ އިއްޔެ ކ. ގާފަރަށް ވަޑައިގެން އެ ރަށު ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.
މަސްވެރިން މިފްކޯއަށް ކިރާ މަހަށް ގިނަވެގެން 48 ގަޑިއިރުގެ ތެރޭގައި ފައިސާ ޖަމާކޮށްދިނުމަކީ ރައީސް މުއިއްޒުގެ ރިޔާސީ ވައުދެކެވެ.
ރައީސް މުއިއްޒު ވިދާޅުވީ މިހާރުގެ އަމާޒަކީ އެމަނިކުފާނު ވައުދުވެވަޑައިގެންނެވި ގޮތަށް މަސްވެރިން މަސް ކިރާތާ ގިނަވެގެން 48 ގަޑިއިރު ތެރޭގައި ފައިސާ ދިނުން ކަމަށެވެ. އެކަން އެގޮތަށް ހަމަޖެއްސުމަށްޓަކައި ފިނޭންސް މިނިސްޓްރީއާއި ބީއެމްއެލް އަދި މިފްކޯއާ ދެމެދު ވަރަށް މުހިއްމު އެއްބަސްވުމެއް ހަދާފައިވާ ކަމަށް ވިދާޅުވި އެވެ.
އެ އެއްބަސްވުމުގެ ނަތީޖާއެއްގެ ގޮތުން މިއަދުން ފެށިގެން ގިނަވެގެން 48 ގަޑިއިރު ތެރޭގައި ބީއެމްއެލްގައި ހުޅުވާފައިވާ މަސް އޮޑިތަކުގެ ވެރިންގެ އެކައުންޓްތަކަށް ފައިސާ ޖަމާކުރާނެ ކަމަށް ވިދާޅުވި އެވެ.