އުތުރު ކޮރެއާގެ 10،000 އަށްވުރެ ގިނަ ސިފައިން މިހާރު ތިބީ ރަޝިޔާގެ ކުރްސްކް ސަރަހައްދުގައި ކަމަށް އެމެރިކާގެ ޕެންޓަގަންއިން ހާމަކޮށްފި އެވެ.
މި ސިފައިން ޔޫކްރޭންއާ ދެކޮޅަށް ހިންގާ ހަނގުރާމަވެރި އޮޕަރޭޝަންތަކުގައި ބައިވެރިވާނެ ކަމަށް ލަފާކުރެވޭ ކަމަށް އެމެރިކާގެ އެއާފޯސްގެ މޭޖަ ޖެނެރަލް ޕެޓް ރައިޑާ ވިދާޅުވި އެވެ.
"މި މަޢުލޫމާތު ލިބުމާ ގުޅިގެން ޔޫކްރޭންގެ ބައިވެރިންނާއި އެހެނިހެން އެކުވެރި ޤައުމުތަކާއެކު މަޝްވަރާތައް ކުރިއަށްދޭ" ޖެނެރަލް ރައިޑާ ވިދާޅުވި އެވެ.
އެހެންނަމަވެސް މިވަގުތު ޔޫކްރޭންގެ އެތެރޭގައި އުތުރު ކޮރެއާގެ ސިފައިން އުޅޭކަން ކަށަވަރުކޮށްދޭނެ ހެތްކެއް ނެތް ކަމަށްވެސް އޭނާ ފާހަގަކުރެއްވި އެވެ.
މި ކަންބޮޑުވުން ނޭޓޯގެ ސެކްރެޓަރީ ޖެނެރަލްވެސް ވަނީ ފާޅުކުރައްވާފަ އެވެ. ނަމަވެސް ބްރިކްސްގެ ބައްދަލުވުމެއްގައި ވާހަކަ ދައްކަވަމުން ރަޝިޔާގެ ރައީސް ވްލަދިމީރް ޕޫޓިން ވިދާޅުވީ މިއީ އުތުރު ކޮރެއާއާއި ރަޝިޔާގެ އަމިއްލަ މައްސަލައެއް ކަމަށާއި، އެހެން ޤައުމުތަކުން މިކަމާ ގުޅޭގޮތުން ކަންބޮޑުވާން ނުޖެހޭނެ ކަމަށެވެ.
މިކަމުން ޔޫކްރޭންއަށް ކުރިމަތިވެދާނެ ނުރައްކަލާމެދު ބައިނަލްއަޤްވާމީ މުޖުތަމަޢުގެ ކަންބޮޑުވުން އިތުރުވަމުންދާ ކަމަށް ސަލާމަތީ ދާއިރާގެ މާހިރުން ބުނެ އެވެ.