ބަލިވެ އިންކަން ސިއްރުކޮށް، ކޯޓަށް ދޮގު މައުލޫމާތު ދީގެން ކައިވެނި ކުރި އަންހެނެއްގެ މައްޗަށް ހުކުމެއް އިއްވައިފި އެވެ.
މާލޭން އުތުރުގެ ރަށެއްގައި އޮޅުވާލައިގެން ކައިވެނި ކުރި މި ހާދިސާއަކީ 2022 ވަނަ އަހަރުގެ ކުރީކޮޅު ހިނގި ހާދިސާ އެކެވެ.
ދެހާސްބާސްވީސް ވަނަ އަހަރުގެ ކުރީކޮޅު އުތުރުގެ ރަށަކަށް ނިސްބަތްވާ އެ އަންހެން މީހާ ކައިވެނި ކުރީ އޭނާ ބަލިވެ އިންކަން ސިއްރުކޮށް ކޯޓަށް އެ މައުލޫމާތު އޮޅުވާލައިގެންނެވެ.
އެ އަންހެން މީހާ، އޮޅުވާލައިގެން ކައިވެނިކުރިކަން ފަޅާ އެރީ ކައިވެންޏަށް ހަތަރު މަސް ނުވަނީސް، ދުވަސްފުރައި ވިހެއުމުންނެވެ.
ކައިވެންޏަށް ހަތަރު މަސް ނުވަނީސް އެ އަންހެން މީހާ ވިހާފައިވަނީ 38 ހަފްތާ ފުރިފައިވާ ކުއްޖެކެވެ. އެހެންކަމުން ދައުލަތުން ވަނީ އެ އަންހެން މީހާގެ މައްޗަށް ދައުލަތުގެ އިދާރާއަކަށް ދޮގު މައުލޫމާތު ދިނުމުގެ ކުށުގެ ދައުވާއާއި ޒިނޭ ކުރުމުގެ ދައުވާ އުފުލާފަ އެވެ.
މި ދެ ދައުވާއަށްވެސް އަންހެން މީހާ ވަނީ ޝަރީއަތުގައި އިއުތިރާފު ވެފަ އެވެ. ދެ ދައުވާގެ ތެރެއިން ދައުލަތުގެ އިދާރާއަކަށް ދޮގު މައުލޫމާތު ދިނުމުގެ ކުށުގެ ދައުވާއަށް އަންހެން މީހާ އިއުތިރާފުވުމުން އޭނާގެ މައްޗަށް ދެ މަހާއި 12 ދުވަހުގެ ޖަލު ހުކުމެއް އިއްވިއެވެ. އެކަމަކު ޝަރީއަތުން ވަނީ އެ ހުކުމް، އެއް މަސް ދުވަހަށް ގޭބަންދު ކުރުމާއި އެކު 8،400 ރުފިޔާގެ ޖޫރިމަނާއަކަށް ބަދަލުކޮށްފަ އެވެ.
އަންހެން މީހާގެ މައްޗަށް ޒިނޭ ކުރުމުގެ ކުށް ސާބިތުވުމުން އޭނާގެ މައްޗަށް އިއްވާފައިވަނީ 100 އެތި ފަހަރުން ހައްދު ޖެހުމާއެކު އެއް އަހަރު ދުވަހަށް ގޭބަންދު ކުރުމަށެވެ.