ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އަށް މި އަހަރުގެ ތިންވަނަ ކުއާޓަރުގައި އާމްދަނީގެ ގޮތުގައި 3.5 ބިލިއަން ރުފިޔާ ލިބިއްޖެ އެވެ.
އެސްޓީއޯ އިން އާންމުކޮށްފައިވާ މި އަހަރުގެ ތިންވަނަ ކުއާޓަރުގެ މާލީ ހިސާބުތައް ދައްކާ ގޮތުން މި އަހަރުގެ ދެވަނަ ކުއާޓަރާ އަޅާބަލާއިރު ތިންވަނަ ކުއާޓަރުގައި ކުންފުނީގެ އާމްދަނީ އާއި ހިންގުމުގެ ފައިދާ އަދި ސާފު ފައިދާ ވަނީ އިތުރުވެފަ އެވެ.
އެސްޓީއޯއަށް މި އަހަރުގެ ދެވަނަ ކުއާޓަރުގައި އާމްދަނީގެ ގޮތުގައި ލިބުނީ 3.4 ބިލިއަން ރުފިޔާ އެވެ.
އޮޕަރޭޓިން ޕްރޮފިޓް -- ހިންގުމުގެ ފައިދާގެ ގޮތުގައި މި އަހަރުގެ ތިންވަނަ ކުއާޓަރުގައި 251 މިލިއަން ރުފިޔާ ލިބުނުއިރު ސާފު ފައިދާގެ ގޮތުގައި 156 މިލިއަން ރުފިޔާ ލިބުނެވެ.
ހިންގުމުގެ ފައިދާގެ ގޮތުގައި ދެވަނަ ކުއާޓަރުގައި ލިބުނީ 203 މިލިއަން ރުފިޔާ އެވެ. ދެވަނަ ކުއާޓަރުގެ ސާފު ފައިދާއަކީ 148 މިލިއަން ރުފިޔާ އެވެ.