ހުޅުމާލޭގައި ޒަމާނީ ފެންވަރަށް ގާއިމުކޮށްފައިވާ ޕެޓް ކެއާ ފެސިލިޓީ -- "އޮޅު ހިޔާ" ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހުޅުއްވައިދެއްވައިފި އެވެ.
ހުޅުމާލޭގެ ދެވަނަ ފިޔަވަހީގައި މިއަދު ހުޅުވި ޕެޓް ކެއާ ފެސިލިޓީއަކީ ރައީސް މުއިއްޒުގެ ރިޔާސީ ވައުދުތަކުގެ ތެރޭގައި ހިމެނޭ ކަމެކެވެ.
މާލެ ސިޓީ ކައުންސިލުން މިމަސައްކަތް ފުރަތަމަ ފެށީ ރައީސް މުއިއްޒު މާލޭގެ މޭޔަރު ކަމުގައި ހުންނެވި ދުވަސްވަރު އެވެ. އެހެންނަމަވެސް އޭރު އޮތް އެމްޑީޕީގެ ސަރުކާރުން މިމަސައްކަތަށް އެއްބާރުލުން ދީފައެއް ނުވެ އެވެ.
މިރަސްމިއްޔާތުގައި ރައީސް މުއިއްޒު ވިދާޅުވީ އެމަނިކުފާނު ވެރިކަމާ ހަވާލުވެވަޑައިގަތުމަށްފަހު މި މަސައްކަތަށް ހާއްސަ ސަމާލުކަމެއް ދެއްވުމަށާއި ރާއްޖޭގައި މިފަދަ ދިރޭތަކެތި ރައްކާތެރި ގޮތެއްގައި ބެލެހެއްޓުމަށް ރާއްޖޭގައި ފުރަތަމަ ފަހަރަށް އެނިމަލް ވެލްފެއާ މިނިސްޓްރީގެ ނަމުގައި މިނިސްޓްރީއެއް ގާއިމުކުރެއްވީ ކަމަށެވެ. މި ފެސިލިޓީ ގާއިމުކުރުމަށް ބިން ހަމަޖައްސަވައި ހުރިހާ ވަސީލަތްތަކެއް މަގުފަހިކޮށްދެއްވައި މި މަޝްރޫއު ކުރިއަށް ގެންދިއުމަށް މާލެ ސިޓީ ކައުންސިލާ ހަވާލުކުރީ މިސަރުކާރުގައި ކަމަށްވެސް ވިދާޅުވި އެވެ.
މި ރަސްމިއްޔާތުގައި ރައީސުލްޖުމްހޫރިއްޔާ ވަނީ ޕެޓް ކެއާ ފެސިލިޓީ ހުޅުއްވައިދެއްވައި އެތަން ބައްލަވާލައްވާފަ އެވެ.
އޮޅު ހިޔާ އަކީ މި ސަރުކާރުގެ އިސްނެންގެވުމުގެ މަތީން މާލޭގެ މަގުތަކުގައި ގިނަވަމުންދާ ބުޅަލުގެ މައްސަލައަށް ދާއިމީ ހައްލެއް ހޯދުމުގެ ގޮތުން ޒަމާނީ ފެންވަރަށް ތަރައްގީކޮށްފައިވާ ފެސިލިޓީ އެކެވެ. މި މަޝްރޫއުގެ މަގުސަދުތަކުގެ ތެރޭގައި ރާއްޖޭގައި ޕެޓްކެއާގެ ހަރުދަނާ ގަވާއިދުތަކަކާއި އުސޫތަކެއް ތަންފީޒުކުރުންވެސް ހިމެނެ އެވެ.