ހުޅުމާލޭގައި ހަދަމުންދާ ބުޅާ ފެސިލިޓީ މިއަހަރުގެ ނޮވެމްބަރު މަހުގެ ތެރޭގައި ބޭނުންކުރަން ފެށޭނެ ކަމުގައި މާލެ ސިޓީ ކައުންސިލުން ބުނެފި އެވެ.
ބުޅާ ފެސިލިޓީ ހުޅުވުމަށްޓަކައި މާލެ ސިޓީ ކައުންސިލުން މިހާރު ދަނީ އެންމެ ފަހުގެ ތައްޔާރީތައް ވަމުންނެވެ.
އެނިމަލް ވެލްފެއާ މިނިސްޓްރީއާއި މާލެ ސިޓީ ކައުންސިލުން ހުޅުމާލޭގައި ބުޅާ ފެސިލިޓީއެއް އެޅުމުގެ މަސައްކަތް ފެށީ މިދިޔަ މާޗް މަހުގެ ތެރޭގަ އެވެ.
މާލެ ސިޓީ ކައުންސިލްގެ އޮފިޝަލަކު އަވަސްއަށް ވިދާޅުވީ މާލެ ތެރޭގައި ގިނަވެގެން އުޅޭ ބުޅާތައް ނޮވެމްބަރު މަހުގެ ތެރޭގައި ބުޅާ ފެސިލިޓީއަށް ގެންގޮސް ނޮވެމްބަރު މަހުގެ ތެރޭގައި އެތަން ބޭނުންކުރަން ފަށާނެ ކަމަށެވެ.
"ބުޅާތައް ދާއިމީކޮށް ތިބޭ ތަނަށް ބަދަލުކުރާނީ ފުރަތަމަ ބުޅާތައް އެހެން ތަނެއްގައި ބޭތިއްބުމަށްފަހު ބަލަންޖެހޭ ކަންތައްތަކެއް ބެލުމަށްފަހު،" އޭނާ ވިދާޅުވި އެވެ.
ފެސިލިޓީ ހެދުމުގެ މަސައްކަތް ފެށީ މާލޭ ސަރަހައްދުގެ މަގުތަކާއި އާންމުން އެއްވާ ފަދަ ތަންތަނުގައި ބުޅާތައް ގިނަވެފައިވުމުގެ ސަބަބުން ބުޅާތަކަށް އަޅާލާ، ރައްކާތެރި މާހައުލެއް ފޯރުކޮށްދިނުމަށެވެ.
ފެސިލިޓީ އެޅަމުންދަނީ ހުޅުމާލޭ ދެވަނަ ފިޔަވަހިންދޫކޮށްފައިވާ 5،000 އަކަފޫޓުގެ ބިމެއްގައެވެ.
މި ފެސިލިޓީގައި ބުޅާތަކަށް ހިޔާވެހިކަމާއި، ސިއްހީ ގޮތުން އެކަށޭނަ ފަރުވާ ލިބި، ބުޅާތަކަށް ހާއްސަ ކްލިނިކާއި ލެބޯޓްރީއެއްގެ އިތުރުން ކަރަންޓީނު ކުރެވޭނެ ސަރަހައްދެއްވެސް އޮންނާނެ އެވެ.