އެއްވެސް ކަމެއްގެ ސަބަބުން ގައުމީ ވަހުދަތަށް އުނިކަން އައިސްގެން ނުވާނެ ކަމަށާއި، ނުގުޑާ ފަދަ އަޒުމަކާއެކު ދިވެހިންގެ އެއްބައިވަންތަކަން ހިފަހައްޓަން ވާނެ ކަމަށް ކުރީގެ ރައީސް މައުމޫން އަބްދުލް ގައްޔޫމް ވިދާޅުވެއްޖެ އެވެ.
ނަސްރުގެ ދުވަހުގެ މުނާސަބަތުގައި މިރޭ ދަރުބާރުގޭގައި ބޭއްވި ހާއްސަ ޖަލްސާގައި ރައީސް މައުމޫން ވިދާޅުވީ ގައުމީ އުސޫލުތަކަކީ ސިޔާސީ ކަންކަމަށް ވުރެ އިސްކަންދޭންޖެހޭ ކަންތައްތަކެއް ކަމަށެވެ. އަދި ގައުމުގެ އިއްޒަތާއި ޝަރަފަށްޓަކައި ފުރާނައިން ގުރުބާންވުމަކީ ދިވެހިންގެ ތެރޭގައި ވަރަށް ފުނަށް، ބިންވަޅުނެގިފައިވާ ކަމެއްކަން ނަޞްރުގެ ދުވަހު އެނގިވަޑައިގެންނެވި ކަމުގައި އެ ދުވަހު ރައީސުލްޖުމްހޫރިއްޔާގެ މަގާމުގައި ހުންނެވި ރައީސް މައުމޫން ވިދާޅުވި އެވެ.
"ދުނިޔޭގެ ކަންތައްތައް ބަދަލުވަމުންދާ ގޮތުން ރާއްޖޭގެ ގައުމީ މަސްރަޙަށް ބަދަލުތަކެއް އައި. އަދި ޒަމާނާ އެކަށީގެންވާ ގޮތަކަށް ރާއްޖޭގެ ގާނޫނުތަކާއި ގަވައިދުތައް ބަދަލުވަމުން ދިޔަ ނަމަވެސް ރާއްޖޭގައި ސިޔާސީ ޕާޓިތަކެއް އުފެދި ހިނގަމުންދިޔަ ނަމަވެސް، މިއިން އެއްވެސް ކަމެއްގެ ސަބަބުން އަޅުގަނޑުމެންގެ ގައުމީ ވަހުދަތަށް އެއްވެސް އުނިކަމެއް އައިސްގެން ނުވާނެ،" މައުމޫން ވިދާޅުވި އެވެ.
ރައީސް މައުމޫން، ނަސްރުގެ ދުވަހު ޝަހީދުވި ސިފައިން ސިފަކުރެއްވީ ގައުމުގެ މިނިވަންކަމާ ސިޔާދަތުގެ ދިފާއުގައި އަދި ދިވެހިރާއްޖޭގެ އިއްޒަތާ ޝަރަފަށްޓަކައި މަރުވެދިޔަ ގައުމީ އަބުތާލުންގެ ގޮތުގައެވެ. އަދި އެ ދުވަހު ގައުމަށް ލިބުނު ނަސްރަކީ، މާތް ﷲ ގެ ހަޟްރަތުން ލިބުނު ނަސްރެއްކަން ހަނދާންކުރަންޖެހޭ ކަމަށްވެސް ވިދާޅުވި އެވެ.
"އަޅުގަނޑުމެންގެ އަމިއްލަ ސަލާމަތާއި ރައްކާތެރިކަމަށްޓަކައިވެސް އަޅުގަނޑުމެންގެ އީމާންކަން ވަރުގަދަކޮށް، މާތްﷲ އަށް އޮންނަ ލޯބި އިތުރުކުރަންޖެހޭ،" ރައީސް މައުމޫން އިލްތިމާސްކުރެއްވި އެވެ.
އޭރުވެސް އަދި ފަހުންވެސް ދިވެހި ސިޔާދަތައް ތާއީދުކުރާ، އެކުވެރި ގައުމުތަކާއި، ބައިނަލްއަގްވާމީ ޖަމާއަތްތަކަށް ޝުކުރު ދަމަހައްޓަންޖެހޭ ކަމަށްވެސް ރައީސް މައުމޫން ވިދާޅުވި އެވެ. އަދި ނަސްރުގެ ދުވަހު އެހީތެރިވެ ދިން ގައުމުތަކާއި ޖަމިއްޔާތަކުގެ އަގުވަޒަން ކުރަންޖެހޭ ކަމުގައިވެސް ވިދާޅުވި އެވެ.
ރައީސް މައުމޫން ވިދާޅުވީ ދުނިޔޭގެ ސިޔާސީ އޮއިވަރުތައް ހިނގަމުންދާ ގޮތުން ރާއްޖެއަށް ކުއްލި ނުރައްކަލެއް ދިމާވުމަކީ ވެދާނޭ ކަމެއް ކަމަށާއި އެހެންވެ ދިވެހިން އަބަދުވެސް ތިބެންވާނީ ހޭލާ ކަމަށެވެ. އަދި ރާއްޖޭގެ މިނިވަންކަމާއި ސިޔާދަތު ވަރުގަދަކުރައްވައި ދެމެހެއްޓެވުމަށްޓަކައި ރައީސް ޑރ. މުހައްމަދު މުއިއްޒު ގެންގުޅުއްވާ ސިޔާސަތައް ރައީސް ވަނީ ޝުކުރު އަދާކުރައްވައި، ސާބަސް ދެއްވާފަ އެވެ.
ރައީސް މައުމޫންގެ ވާހަަކަފުޅު ނިންމަވާލެއްވީ ދިވެހި ގައުމު އިސްލާމްވީއްސުރެ ދިވެހިރާއްޖެ އޮތީ އިސްލާމީ އުއްމަތުގެ ރޫހާނީ ވިންދު ޖަހާ ގުނަވަނެއްގެ ގޮތުގައި ކަމަށް ވިދާޅުވެ، ފަލަސްތީނުގެ ރައްޔިތުން އަދި ވަކިން ހާއްސަކޮށް ޣައްޒާގެ ރައްޔިތުން ތަހައްމަލް ކުރަމުންދާ ލާއިންސާނީ އަނިޔާ ކުށްވެރިކޮށް، ފަލަސްތީނުގެ ޖިހާދަށް ތާއީދުކުރުމުގައި ދިވެހިން ދެމިތިބުމަށް ދިވެހިންނަށް އިލްތިމާސްކުރައްވަމުންނެވެ.