ސްޕެނިޝް ލީގުގައި ރޭ ކުޅުނު މެޗެއްގައި ބާސެލޯނާ އިން އެސްޕަންޔޯލް އަތުން 3-1 އިން މޮޅުވެ، ލީގުގެ އެއްވަނައިގައި ނުވަ ޕޮއިންޓުގެ ލީޑެއް ނަގައިފި އެވެ.
މެޗުގެ ފުރަތަމަ ގޯލު ޖެހީ 12 ވަނަ މިނިޓްގައި ބާސެލޯނާގެ ޑެނީ އޮލްމޯ އެވެ. އަދި 23 ވަނަ މިނިޓްގައި ރަފީނިއާ ގޯލެއް ޖަހައި، ބާސެލޯނާގެ ލީޑު ފުޅާކޮށްދިނެވެ. އޭގެ ހަތަރު މިނިޓް ފަހުން އެސްޕަންޔޯލްގެ ޖޯފްރޭ ކަރޭރާސް ޖެހި ގޯލު ވީއޭއާރް ބެލުމަށްފަހު ބާތިލުކުރި އެވެ. މެޗުގެ 31 ވަނަ މިނިޓްގައި އޮލްމޯ އިން ދެވަނަ ގޯލު ޖެހުމާއެކު، ފުރަތަމަ ހާފުގައި ބާސެލޯނާ އަށް ރަނގަޅު ލީޑެއް ހޯދުނެވެ.
ދެވަނަ ހާފުގައި އެސްޕަންޔޯލްގެ އަލްވާރޯ ޓެޖޭރޯ ޖެހި ގޯލެއް ވެސް ވީއޭއާރް އިން ބާތިލުކުރި އެވެ. އެކަމަކު ޖަވީ ޕުއާޑޯ ގޯލެއް ޖަހައި މެޗުގައި އެސްޕަންޔޯލަށް އަބުރުވެރި ނަތީޖާއެއް ހޯދައިދިނެވެ.
މި ކާމިޔާބީއާއެކު 12 މެޗުން 33 ޕޮއިންޓް ހޯދާފައިވާ ބާސެލޯނާ އިން ވަނީ 11 މެޗުން 24 ޕޮއިންޓް ހޯދައިގެން ދެވަނައިގައި އޮތް ރެއާލް މެޑްރިޑްގެ މައްޗަށް ނުވަ ޕޮއިންޓުގެ ލީޑެއް ނަގާފަ އެވެ.
ސްޕެއިނުގެ ވެލެންސިއާ އަށް ދިމާވެފައިވާ ފެންބޮޑުވުމުގެ ހާދިސާއާ ގުޅިގެން ރެއާލް މެޑްރިޑްގެ މެޗު ވަނީ ކެންސަލްކޮށްފަ އެވެ.
ލީގުގެ ތިންވަނައިގައި އޮތް އެތުލެޓިކޯ މެޑްރިޑް އިން ވަނީ ކުޅުނު މެޗުގައި ލަސް ޕަލްމާސް އަތުން 2-0 އިން މޮޅުވެ، 12 މެޗުން 23 ޕޮއިންޓް ހޯދާފަ އެވެ.