ސްޕެއިންގެ ވެލެންސިއާ ސަރަޙައްދުގައި ފެންބޮޑުވެގެން ގިނަ އަދަދެއްގެ މީހުން މަރުވެފައި ވަނިކޮށް އެ ސަރަޙައްދަށް ޒިޔާރަތް ކުރެއްވި ސްޕެއިންގެ ރަސްގެފާނު ފެލިޕޭ އަދި ރާނީ ލެޓިޒިއާގެ ހަށިކޮޅަށް ކިސަޑާ އަދި އެހެނިހެން އެއްޗެހިވެސް އުކައިފި އެވެ.
ބީބީސީގެ ރިޕޯޓެއްގައި ބުނެފައިވާ ގޮތުގައި މި ހާދިސާ ހިނގާފައިވަނީ ފެންބޮޑުވުމުގެ ސަބަބުން އެންމެ ބޮޑަށް ގެއްލުން ލިބުނު ސަރަހައްދުތަކުގެ ތެރެއިން އެއް ސަރަހައްދު ކަމަށްވާ ޕައިޕޯޓާއަށް ރަސްގެފާނާއި ރާނީ ޒިޔާރަތް ކުރެއްވި ވަގުތު އެވެ. އެ ދެ ބޭފުޅުންނާއެކު ސްޕެއިންގެ ބޮޑުވަޒީރު އަދި އެހެނިހެން އިސް ވެރިންވެސް އެ ސަރަޙައްދަށް ޒިޔާރަތް ކުރެއްވި އެވެ.
މުޒާހަރާކުރި ފަރާތްތަކުން ރަސްގެފާނާ މުހާތަބުކޮށް "މަރާލި މީހާ" އަދި "ލަދުގަންނަންޖެހޭ" ފަދަ ބަސްތައް ގޮވަމުން ދިޔަ އެވެ. ބަޔަކު ކިސަޑު އުކި ނަމަވެސް ރަސްގެފާނާއި ރާނީ އާންމުންނާ ބައްދަލުކުރައްވާ އެ މީހުންނަށް ހިތްވަރު ދެއްވި އެވެ.
ބީބީސީގެ ރިޕޯޓުގައި ބުނެފައިވާ ގޮތުގައި މިއީ ފާއިތުވި އެތައް އަހަރެއްގެ ތެރޭގައި ސްޕެއިނަށް ދިމާވި އެންމެ ނުރައްކާތެރި ފެންބޮޑުވުމުގެ ހާދިސާ އެވެ.
މި ހާދިސާގައި 200 އަށް ވުރެ ގިނަ މީހުން މަރުވެފައިވެ އެވެ. އަދި ދިރިހުރި މީހުން ހޯދުމަށާއި މަރުވެފައިވާ މީހުންގެ ހަށިގަނޑުތައް ނެގުމަށް، ބިމުއަޑީގެ ކާރު ޕާކިންތަކާއި ޓަނަލްތަކުގައި ކުއްލި ހާލަތުގެ މަސައްކަތްތެރިން މަސައްކަތް ކުރަމުންދާ ކަމަށް ބީބީސީ އިން ބުނެފައިވެ އެވެ.
ފެންބޮޑުވުމުގެ ސަބަބުން ގިނަ އަދަދެއްގެ މީހުން ގެދޮރު ގެއްލި، ވަރަށް ބޮޑެތި ގެއްލުންތަކަކާ ކުރިމަތިލާން ޖެހިފައި ވެއެވެ. އަދި ގިނަ އަދަދެއްގެ މީހުން މަރުވެފައިވުމާއެކު، ސަރުކާރުގެ އިހުމާލު އޮތް ކަމަށް ބުނެ ގިނަ ބަޔަކު ރުޅިއައިސްފައިވާ ކަމަށް ބީބީސީ އިން ފާހަގަކޮށްފައިވެ އެވެ.
މި ހާދިސާއާ ގުޅިގެން ސަރުކާރުން އަޅާފައިވާ ފިޔަވަޅުތަކާ މެދު ހިތްހަމަނުޖެހޭ ކަމަށް ބުނެ ގިނަ ބަޔަކު މުޒާހަރާ ކުރަމުންދާ ކަމަށްވެސް ބީބީސީ އިން ބުނެފައިވެ އެވެ.