ސްޕެއިންގެ އިރުމަތީ ސަރަހައްދެއްގައި ވަރަށް ބޮޑަށް ފެންބޮޑުވެ 72 މީހަކު މަރުވެފައިވާ ކަމަށް އެ ގައުމުގެ އާންމު ޓީވީ -- އާރްޓީވީއީ އިން ބުނެފި އެވެ.
މި ހާދިސާގައި މަރުވި މީހުންގެ އަދަދު އަދި މިއަށް ވުރެ އިތުރުވާނެ ކަމަށް ބެލެވިފައި ވާއިރު، ގެއްލިފައި ވަނީ ކިތައް މީހުންކަން ބުނެދޭން ނޭނގޭ ކަމަށް އިދާރާތަކުން ބުންޏެވެ.
ރިޕޯޓްތައް ބުނާ ގޮތުން ސްޕެއިންނަށް އާންމުކޮށް ވާރޭ ވެހޭ އަދަދަށް ބަލާއިރު، އެވްރެޖް އަހަރަކަށް ވާ ވަރަށް ވުރެ މި ހާދިސާގައި ވަނީ ވާރޭވެހިފަ އެވެ.
މޫސުމާ ބެހޭ އިދާރާތަކުން ބުނާ ގޮތުން ސްޕެއިންނަށް މި ފަހަރު މިހާ ބޮޑުވަރުވީ އެއްފަރަހާ ދެ ތޫފާނެއް އެރުމުންނެވެ. ތޫފާން ނުރައްކާ ބޮޑު ކަމަށް ވިދާޅުވެ ސްޕެއިންގެ ބޮޑުވަޒީރު ޕެޑްރޯ ސަންޗޭޒް ވަނީ އާންމު ގޭގައި ބަޑުކުރެއްވުމަށް އެދިވަޑައިެންފަ އެވެ.
މި ހާލަތުގައި އާންމުންގެ ސަލާމަތާއި ރައްކާތެރިކަން ކަށަވަރުކުރުމަށް ސަރުކާރުން މަސައްކަތްކުރާއިރު، މީހުން ސަލާމަތްކުރުމުގައި ހަރަކާތްތެރިވާ އޮފިޝަލުންނަށް އާންމުން އެއްބާރުލުން ދެއްވުމަށް ބޮޑުވަޒީރު އެދިވަޑައިގެންނެވި އެވެ.
އަދި މި ހާލަތުން ފައިދާ ނުނަންގަވައި، ދައުލަތުގެ މުދަލަށާއި އާންމުންގެ މުދަލަށް ގެއްލުން ނުދިނުމަށް ވެސް ބޮޑުވަޒީރު ސަންޗޭޒް އެދިވަޑައިގެންނެވި އެވެ.
ހާލުގައި ޖެހުނު މީހުންނަށް އެކަށީގެންވާ ވަރަށް އެހީތެރިކަން ފޯރުކޮށްދެއްވާނެ ކަމަށް ބޮޑުވަޒީރު ވިދާޅުވި އެވެ. ސްޕެއިނަށް ތަކާވަރު ނުވެއްޖެ ނަމަ ޔޫރަޕިއަން ޔޫނިއަން ވެސް އޮތީ ތައްޔާރަށް ކަމަށް އޭނާ ވިދާޅުވި އެވެ.
އެހީދޭ ފަރާތްތަކަށް އަދިވެސް އެހީ ފޯރުކޮށް ނުދެވޭ މީހުން ތިބި ކަމަށް ބޮޑުވަޒީރު ވިދާޅުވި އެވެ. އެއީ ތޫފާންގެ ސަބަބުން ދަތުރުކޮށް އުޅުމަށް ބޮޑެތި ހުރަސްތައް މެދުވެރިވެފައި ވާތީ ކަމަށް ވެސް އޭނާ ވިދާޅުވި އެވެ.