ރާއްޖޭގައި މަތީ ފަންތީގެ ރިސޯޓެއް ތަރައްގީ ކުރަމުންދާ ދުބާއީގެ ދަމަކް ގްރޫޕުން އެއާލައިނެއް ފަށަން ނިންމައިފި އެވެ.
ދަމަކް ގުރޫޕަކީ ލަގްޒަރީ ރިއަލް އެސްޓޭޓް ޑިވެލޮޕަރުންގެ ތެރޭގައި މަޝްހޫރު ކުންފުންޏެކެވެ.
އެ ކުންފުނިން ރާއްޖޭގެ އައިމާ ކުންފުންޏާ ހަވާލުކޮށްގެން މެންޑަރިން އޮރިއެންޓަލްގެ ނަމުގައި ރިސޯޓެއް ތަރައްގީ ކުރަނީ 34 ހެކްޓަރުގެ ބޮޑު ރަށެއް ކަމަށްވާ ކ. ބޮލިދުއްފަރުގައެވެ.
ދަބަކް ގުރޫޕުން މިހާރު ވަނީ ކުރިއަށް އޮތް ހައެއްކަ ދުވަހުގެ ތެރޭގައިއެ ކުންފުނީގެ އަމިއްލަ އެއާލައިނެއް ފެށުމަށް ނިންމާފައިވާ ކަމަށް އިއުލާންކޮށްފަ އެވެ.
މި އެއާލައިން ދަތުރުކުރުމަށް ހަމަޖެހިފައިވަނީ ދަމަކް ގުރޫޕްގެ ޓޫރިޒަމް ވިޔަފާރި ހިންގަމުންދާ ގައުމުތަކަށެވެ. އެގޮތުން ރާއްޖެއާއި، އިންޑޮނޭޝިއާގެ ބާލީ އާއި، ފިޖީއާއި، ސީޝެލްސް އާއި ހަވާއީގެ އިތުރުން ބޯރާބޯރާ އަށެވެ.
މެންޑަރިން އޮރިއެންޓަލްއަކީ ތިން ރަށް ހިމެނޭހެން ގާތްގަނޑަކަށް 2.2 ބިލިއަން ރުފިޔާ ހަރަދުކޮށްގެން ހަދާ ރިސޯޓެކެވެ. އަންނަ އަހަރު ހުޅުވުމަށް ހަމަޖެހިފައިވާ މި ރިސޯޓުގައި ޖުމްލަ 120 ކޮޓަރި ހުރެ އެވެ. މީގެއިތުރުން މެޑަރިން އޮރިއެންޓަލްގެ އައިކޮނިކް 10 ރެސިޑެންސް ވެސް މިތަނުގައި ހެދުމަށް ހަމަޖެހިފައިވެ އެވެ.