ސިޔާސީ ޕާޓީއެއްގެ މެމްބަރަކު ގާނޫނާއި ހިލާފު ކަމެއް ކޮށްފިނަމަ އެމީހަކު ޖޫރިމަނާ ކުރުމުގެ އިތުރުން އެ މީހަކު ނިސްބަތްވާ ޕާޓީއެއް އެއްލައްކަ ރުފިޔާއިން ޖޫރިމަނާ ކުރެވޭ ގޮތަށް ސިޔާސީ ޕާޓީތަކުގެ ގާނޫނަށް ހުށަހެޅި އިސްލާހު ރައްޔިތުންގެ މަޖިލީހަށް ބަލައިގަނެފި އެވެ.
ގާނޫނަށް މި އިސްލާހު ހުށަހެޅުއްވީ ސަރުކާރުގެ ފަރާތުން ދިއްދޫ ދާއިރާގެ މެންބަރު ޢަބްދުއްލަޠީފް މުޙައްމަދު އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މި ބިލް މަޖިލީހަށް ބަލައިގަންނަން ފެންނަ ކަމަށް 60 މެންބަރުން ވޯޓު ދެއްވިއިރު ނުފެންނަ ކަމަށް ފަސް މެންބަރުން ވޯޓު ދެއްވި އެވެ.
މި ބިލް މަޖިލީހަށް ބަލައިގަތުމަށް ފާސްވުމުން މި ބިލް ދިރާސާކުރަން ފޮނުވީ މުޅި މަޖިލީހުގެ ކޮމިޓީއަށެވެ.
އިސްލާހުގައި ޕާޓީއެއްގެ މެންބަރަކު ގާނޫނާއި ހިލާފު ކަމެއް ކޮށްފިނަމަ އެމީހަކު 30،000 ރުފިޔާ އާއި 75،000 ރުފިޔާގެ އަދަދަކުން ޖޫރިމަނާ ކުުރުމުގެ އިތުރުން އެ އަމަލެއް ހިންގި މީހެއް ނިސްބަތްވާ ޕާޓީއެއް 100،000 ރުފިޔާ އިން ޖޫރިމަނާ ކުރުމަށް ވަނީ ހިމަނާފަ އެވެ.
ގާނޫނުގައި މިހާރު އޮތް ގޮތުން ކޮންމެ އަހަރަކު ދައުލަތުގެ ބަޖެޓުން ސިޔާސީ ޕާޓީ ހިންގުމަށް ދޫކުރަނީ ދައުލަތުގެ އަހަރީ ބަޖެޓުގެ 0.1 ޕަސެންޓާއި 0.2 ޕަސެންޓާ ދެމެދުގެ އަދަދެކެވެ.
އިސްލާހުގައި ވަނީ އެ އަދަދު ދައުލަތުގެ އަހަރީ ބަޖެޓުގެ އާމްދަނީގެ 0.1 ޕަސެންޓާއި 0.2 ޕަސެންޓާ ދެމެދުގެ އަދަދަކަށް ބަދަލުކުރަން ހިމަނާފަ އެވެ.