މޯލްޑިވްސް ހައްޖު ކޯޕަރޭޝަނަކީ ފައިދާވާ ކުންފުންޏަކަށް ހެދުމަށްޓަކައި ކ. މާފުށީގައި ސިޓީ ހޮޓަލެއް އެޅުމަށް ނިންމާފައިވާ ކަމަށް އެ ކުންފުނީގެ މެނޭޖިން ޑިރެކްޓަރު މުހައްމަދު ޝަކީލް ވިދާޅުވެއްޖެ އެވެ.
ޝކީލް މިހެން ވިދާޅުވީ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގެ މިއަދުގެ ބައްދަލުވުމުގައި ހައްޖު ކޯޕަރޭޝަންގެ މަސައްކަތްތަކާ ގުޅޭގޮތުން ފުވައްމުލަކު މެދު ދާއިރާގެ މެންބަރު އަލީ ފަޒާދު ކުރެއްވި ސުވާލަކަށް ޖަވާބު ދެއްވަމުންނެވެ.
ޝަކީލް ވިދާޅުވީ ސަރުކާރުގެ އަމާޒަކީ ހައްޖު ކޯޕަރޭޝަނަކީ ފައިދާވާ ކުންފުންޏަކަށް ހަދައި، ހައްޖަށް މީހުން ގެންދިއުމަށް ނަގާ އަގު ކުޑަކުރުން ކަމަށެވެ. އެގޮތުން އާމްދަނީ އިތުރުކުރުމަށް ކުރަން އެންމެ ރަނގަޅު މަސައްކަތަކީ ރިއަލް އެސްޓޭޓް ވިޔަފާރީގެ ދާއިރާއަށް ވަނުން ކަމަށް ވާތީ އެދާއިރާއަށް ވަނުމަށް ނިންމާފައިވާ ކަމަށް ވިދާޅުވި އެވެ.
މިމަސައްކަތްތަކުގެ ދަށުން ހަލާލް ޓޫރިޒަމް ތައާރަފްކޮށް މާފުށީގައި ސިޓީ ހޮޓަލެއް ހިންގުމަށް މާފުށީ ކައުންސިލްގެ ކުންފުންޏާއި ހައްޖު ކޯޕަރޭޝަނާ ގުޅިގެން ސަބްސިޑަރީ ކުންފުންޏެއް އުފާއްދާ އެރަށުގައި ސިޓީހޮޓަލެއް އަޅަން ނިންމާފައިވާ ކަމަށް ޝަކީލް ވިދާޅުވި އެވެ. މިމަސައްކަތަށް ބޭނުންވާ ބޮޑު ބިމެއް މާފުށިން ލިބިފައިވާ ކަމަށްވެސް ވިދާޅުވި އެވެ.
"އިންވެސްޓުކުރާ ފަރާތްތަކެއް އަޅުގަނޑުމެންނާ އެޕްރޯޗްވެސް ކޮށްފައި ވަނީ. މާފުށްޓަކީ މިހާރުވެސް ޓޫރިޒަމަށް އެސްޓެބްލިޝްޑް ތަނެއް ވީމާ ވަރަށް ރިސްކު ކުޑަ މި ވިޔަފާރީގައި،" ޝަކީލް ވިދާޅުވި އެވެ.
އޭނާ ވިދާޅުވީ ހުޅުމާލޭގައި ލަގްޒަރީ އެޕާޓްމެންޓް އަޅައިގެން ވިއްކުމަށްވެސް އެ ކުންފުނިން ނިންމާފައިވާ ކަމަށެވެ. އަދި އެ އެޕާޓްމަންޓްތައް އެޅުމަށް ކުރިއަށް އޮތް ދެތިން މަސް ތެރޭގައި ބަޔަކާ ހަވާލުކޮށް އިމާރާތް ކުރުމުގެ އަމަލީ މަސައްކަތް ފަށާނެ ކަމަށްވެސް ވިދާޅުވި އެވެ.
ޝަކީލް އިތުރަށް ވިދާޅުވީ އާމްދަނީ އިތުރު ކުރެވިގެން ނޫނީ ބަޖެޓަށް ބަރޯސާ ނުވެ ހައްޖުގެ އަގު ކުޑަ ނުކުރެވޭނެ ކަމަށެވެ. ހައްޖަށް މީހުން ފޮނުވުމަށް ކުރަންޖެހޭ ހޭދައަކީ ބޭރު ފައިސާއިން ކުރާ މުއާމަލާތްތަކަކަށްވާތީ އެންމެ ބޮޑު ދައްޗަކީ ބޭރު ފައިސާ ލިބުމުގައި ހުރި ދަތިތައް ކަމަށްވެސް ވިދާޅުވި އެވެ. ޓޫރިޒަމްގެ ވިޔަފާރިއަށް ވަދެވިއްޖެނަމަ ބޭރު ފައިސާގެ މައްސަލައަށް ވެސް ލުއިތަކެއް ލިބޭނެ ކަމަށް ވިދާޅުވި އެވެ.