މޯލްޑިވްސް ހައްޖު ކޯޕަރޭޝަންގެ މެނޭޖިން ޑިރެކްޓަރު މުހައްމަދު ޝަކީލްގެ ނަމުގައި ފައިސާ ހޯދަން ސްކޭމް ކޯލްތަކެއް ކުރާތީ އެކަމަށް ސަމާލުވުމަށް އޭނާ އިލްތިމާސް ކުރައްވައިފި އެވެ.
އެކްސްގައި ކުރެއްވި ޕޯސްޓެއްގައި ޝަކީލް ވިދާޅުވީ އޭނާގެ ފަރާތުން ކަމަށް ބުނެ މީހަކު އެކި މީހުންނަށް ގުޅައި ފައިސާ ހޯދަމުންދާކަމުގެ މައުލޫމާތު ލިބިފައިވާ ކަމަށެވެ.
ޝަކީލްގެ ނަމުގައި ފޯނުކުރާ މީހާގެ ނަމާއި ފޯނު ނަންބަރު ހިއްސާކޮށް ޝަކީލް ވަނީ ބޮޑެތި އަދަދުތަކުން ފައިސާ ހޯދުމަށް ގުޅާ ސްކޭމް ކޯލްތަކަށް ސަމާލުވުމަށް އެދިފަ އެވެ.
"އަޅުގަނޑުގެ ފަރާތުން ކަމަށް ބުނެ އެއްވެސް ފަރާތަކުން ފައިސާ ހޯދުމަށް ކުރާ ފޯން ކޯލްތަކަށް އިޖާބަ ނުދިނުމަށް ދަންނަވަން،" ޝަކީލް ވިދާޅުވި އެވެ.
ޝަކީލްގެ ނަމުގައި ސްކޭމް ކޯލްތައްކުރާ މައްސަލަ ބަލައިދިނުމަށް އެދި ފުލުހުންނަށް ހުށަހަޅާފައިވާ ކަމަށްވެސް އޭނާ ވިދާޅުވި އެވެ.
އެކި މީހުންގެ ނަމުގައި ގުޅައި އޮޅުވާލައިގެން ފައިސާ ހޯދުމުގެ މައްސަލަތައް ވަނީ ވަރަށް ބޮޑަށް އިތުރުވެފަ އެވެ.