ކުރިން ބޮޑު މަގުބޫލު ކަމެއް ހޯދި "އިހުސާސް"ގެ ޑައިރެކްޓަރު މުހައްމަދު ހިލްމީ އަހަރުތަކަކަށްފަހު އަނެއްކާވެސް ފިލްމެއް ޑައިރެކްޓް ކުރަން ތައްޔާރުވެއްޖެ އެވެ.
ގާތްގަނޑަކަށް 31 އަހަރު އަހަރުގެ މެދުކެނޑުމަކަށްފަހު ހިލްމީ ޑައިރެކްޓް ކުރާ ފިލްމުގެ ނަމަކީ "ލަމްހާ" އެވެ.
ރާއްޖޭގެ މަަޝްހޫރު ސްޓްރީމިން ޕްލެޓްފޯމް -- ބައިސްކޯފުގެ އޮފީހުގައި ރޭ އޮތް ރަސްމިއްޔާތެއްގައި ވަނީ މި ފިލްމުގެ ނަން އިއުލާންކޮށް، ފިލްމުގެ ފަސްޓްލުކް ޕޯސްޓަރު ދައްކާލާފަ އެވެ.
މީގެއިތުރުން ލަމްހާގައި ހަރަކާތްތެރިވާ ތަރިންވެސް ރޭ ވަނީ ދައްކާލާފަ އެވެ. މިފިލްމުގެ ލީޑް އެކްޓްރެސްއަކަށް ހަމަޖައްސާފައިވަނީ މިހާރު ކުރިއަރަމުން އަންނަ އައިޝާ އަލީ އެވެ. މި ފިލްމުގައި ހިމެނޭ އިތުރު ތަރިންގެ ތެރޭގައި ހިމެނެނީ އަހްމަދު ޝާރިފާއި ނުޒުހަތު ޝުއައިބު (ނުޒޫ)ގެ އިތުރުން އަހްމަދު އީސާ (އާނަންދު) އެވެ.
މި ފިލްމުގައި މޭކަޕް އާޓިސްޓެއްގެ ގޮތުގައި ލަންކާ މީހަކު މަސައްކަތް ކުރާއިރު ކެމަރާމަނެއްގެ ގޮތުގައި މަސައްކަތް ކުރާނީ އިންޑިއާ މީހެކެވެ.
މާޕާ އިން ޕްރޮޑިއުސްކޮށް ހިލްމީ ޑައިރެކްޓް ކުރި "އިހުސާސް" ރިލީޒްކުރީ 1993 ވަނަ އަހަރު އެވެ.