އިންޑޮނީޝިއާގެ އާ ރައީސް ޕްރަބޮވޯ ސުބިއާންތޯ، 73، މަގާމާ ހަވާލުވެވަޑައިގަތުމަށްފަހު ގައުމުން ބޭރަށް ކުރައްވާ ފުރަތަމަ ދަތުރު، ފަސް ގައުމަކަށް ހާއްސަކުރައްވައިފި އެވެ. އޭނާ އެންމެ ފުރަތަމަ ވަޑައިގަންނަވާނީ ޗައިނާ އަށެވެ.
ޕްރަބޮވޯގެ މި ދަތުރުގައި އެމެރިކާއަށް ވަޑައިގަތުން ވެސް ހިމެނެ އެވެ. އެއީ އެމެރިކާގެ ރައީސް ޖޯ ބައިޑަން ދެއްވާފައި އޮތް ދައުވަތަކަށް ކުރައްވާ ދަތުރެކެވެ. މި ދަތުރުގައި އެމެރިކާގެ އިންތިޚާބީ ރައީސް، ޑޮނަލްޑް ޓްރަމްޕްއާ ވެސް ޕްރްބޮވޯ ބައްދަލުކުރައްވާނެ ކަމަް ޚަބަރުތައް ބުނެ އެވެ.
އަދި އެއަށް ފަހު ޕެރޫއަށް ވަޑައިގެން އޭޕެކް ސަމިޓްގައި ބައިވެރިވެވަޑައިގަންނަވާނެ އެވެ. ބްރެޒިލްއަށް ވަޑައިގެން ޖީ20 ސަމިޓްގައި ވެސް ބައިވެެރިވެވަޑައިގަންނަވާނެ އެވެ.
އިނގިރޭސި ބޮޑުވަޒީރު ކެއީރު ސްޓެމާއާ ބައްދަލުކުރެއްވުމަށް ޕްރްބޮވޯ އިނގިރޭސިވިލާތަށް ވަޑައިގަންނަވާނެ ކަމަށް އޭނާގެ އޮފީހުން ބުންޏެވެ.
އެމެރިކާއަށް ކުރައްވާ ދަތުރުގައި ޑޮނަލްޑް ޓްރަމްޕާ ބައްދަލުކުރައްވާ ގޮތަށް އޮތް ނަމަވެސް، އަދި އެއީ މުޅިން ކަށަވަރުވެފައި އޮތް ކަމެއް ނޫން ކަމަށް ބްރަބޮވޯގެ ތަރުޖަމާން ހަސަން ނަސްބީ ވިދާޅުވި އެެވެ.
ރިޕޯޓްތައް ބުނާ ގޮތުން ޚާރިޖީ ސިޔާސަތާ ބެހޭ ގޮތުން ޕްރަބޮވޯ ގެންގުޅުއްވާނީ އިންޑޮނީޝިއާގެ ކުރީގެ ރައީސް ޖޯކޯ ވިޑޯޑޯއަށް ވުރެ ހުޝިޔާރު ސިޔާށަތުތަކެވެ. ވަގުތުން ވަގުތަށް ކަމެއް ނިންމަވަން ޖެހިވައިގެންފި ނަމަ އިޚުތިޔާރު ކުރައްވާނީ ގައުމީ މަސްލަހަތު ކަމަށް އޭނާ ވިދާޅުވި ކަމަށް ތަރުޖަމާން ވިދާޅުވި އެވެ.