މަހުގެ އުފެއްދުންތައް އިތުރުކޮށްގެން ރާއްޖެއިން މަސްބޭރުކުރާ މިންވަރު އިތުރުކުރުމުން ލިބޭ އާމްދަނީ ދެގުނަ ކުރެވޭނެ ކަމަށް ފިޝަރީޒް މިނިސްޓަރު އަހްމަދު ޝިޔާމު ވިދާޅުވެއްޖެ އެވެ.
ދައުލަތުގެ މީޑިއާގައި ޝިޔާމު ވިދާޅުވީ މަސްވެރިން ބާނާ މަހަށް ހަމައަގު ހޯދައިދޭން ކުރާ މަސައްކަތުގައި މިވަގުތަށް އޮތް އެންމެ ބޮޑު ގޮންޖެހުމަކީ މަސްވެރިން ބާނާ ހުރިހާ މަހެއް އެއްފަހަރާ ރައްކާކޮށްފައި ބެހެއްޓުމުގެ ގާބިލްކަން ނެތުން ކަމަށެވެ.
އެހެންވެ މަސް ރައްކާކުރުމުގެ ގާބިލްކަން އިތުރުކުރުމަށް ސަރުކާރުން މުހިއްމު މަސައްކަތްތަކެއް ފަށާފައިވާ ކަމަށާއި ރައީސް ޑރ. މުހައްމަދު މުއިއްޒުގެ ވެރިކަމުގެ މިދައުރުގެ ތެރޭގައި އެކަމުގެ ނަތީޖާ ފެނިގެންދާނެ ކަމަށް ޝިޔާމު ވިދާޅުވި އެވެ.
މިނިސްޓަރު ވިދާޅުވީ މަސް ރައްކާކުރުމުގެ ގާބިލްކަން އިތުރުކުރުމަށް ކުރާ މަސައްކަތުގެ ސަރުކާރުގެ އަމާޒަކީ މި ފަސް އަހަރުގެ ތެރޭގައި 25،000 ޓަނުގެ މަސް ރައްކާ ކުރެވޭ ގޮތް ހެދުން ކަމަށެވެ. އެ މަސައްކަތްތައް އެކި ކުންފުނިތަކާ ހަވާލުކޮށްގެން ރާއްޖޭގެ ތިން ސަރަހައްދެއްގައި މިހާރުވެސް މަސައްކަތްތައް ހިނގަމުންދާ ކަމަށްވެސް ވިދާޅުވި އެވެ.
މިނިސްޓަރު ވިދާޅުވި ގޮތުގައި ފ. ނިލަންދޫގައި 1،500 ޓަނުގެ މަސް ރައްކާކުރެވޭ ސްޓޯރޭޖަކާއި 50 ޓަނު ޕްރޮސެސް ކުރެވޭ ފެސިލިޓީ އަކާއި، ޅ. ފެލިވަރުގައި އިތުރު 100 ޓަނުގެ މަސް ޕްރޮސެސް ކުރެވޭނެ ފެސިލިޓީއަކާއި، ގދ. ފިޔޯރީގައި 3،000 ޓަނުގެ މަސް ރައްކާ ކުރެވޭ ސްޓޯރޭޖަކާއި ދުވާލަކު 100 ޓަނުގެ މަސް ޕްރޮސެސް ކުރެވޭ ފެލިސިޓީއެއް އެޅިގެންދާނެ އެވެ.
"އަޅުގަނޑަށް ޔަގީންކަން އެބައޮތް އިރާދަކުރެއްވިއްޔާ އަޅުގަނޑުމެންގެ މި މަސައްކަތުން އަޅުގަނޑުމެންނަށް ދިވެހިރާއްޖޭގައި ބާނާ ގާތްގަނޑަކަށް ނުވަދިހަ ޕަސެންޓަށް ވުރެ ބޮޑު އިންސައްތައެއް ދަޅަށް ނޫނިއްޔާ ޕައުޗަށް ނޫނިއްޔާ ވެލިއު އެޑްކޮށްގެން ބޭރުކުރެވޭނެކަން،" ޝިޔާމު ވިދާޅުވި އެވެ.
މިނިސްޓަރު އިތުރަށް ވިދާޅުވީ މަސް ރައްކާ ކުރުމުގެ ގާބިލްކަން އިތުރުކުރުމުން މިފްކޯއަށް ލިބޭ ފައިދާވެސް އިތުރުކުރެވިގެންދާނެ ކަމަށެވެ. އޭރުން މަސްވެރިންނަށް ލިބޭ ފައިދާއާއި ފަސޭހަތައް ގިނަ ވާނެ ކަމަށްވެސް ވިދާޅުވި އެވެ.