އަންހެން ވިޔަފާރިވެރިންނަށް ހާއްސަކޮށްގެން ދޫކުރާ ލޯނު 60 ފަރާތަކަށް ދޫކުރަން ނިންމައިފި އެވެ.
އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ) އިން "ފަށާ މަދަދު"ގެ ނަމުގައި ލޯން ދިނުމަށް ހަމަޖެހިފައިވަނީ ވިޔަފާރި ކުރާ އަންހެނުންގެ ތެރެއިން އެކަށީގެންވާ އާމްދަނީއެއް ނުލިބޭ ފަރާތްތަކަށެވެ.
ލޯން ލިބުނު ފަރާތްތަކަށް ލިޔުން ހަވާލުކުރުމަށް ބޭއްވި ރަސްމިއްޔާތުގައި އެސްޑީއެފްސީގެ މެނޭޖިން ޑިރެކްޓަރު އައިޝަތު ފިފްޝީން ވިދާޅުވީ ފަށާ މަދަދު ސްކީމުގެ ދަށުން މީގެކުރިން އަންހެން ވިޔަފާރިވެރިންނަށް ދޫކުރިވަރަށް ވުރެ ގިނައިން ލޯން ދޫކުރާނެ ކަމަށެވެ.
"ފާއިތުވި އަހަރުތަކުގައި، އަންހެނުންނަށް ދޫކުރި ލޯން އެހީގެ އަދަދަކީ 26 އިންސައްތަ. ފަށާ މަދަދު ލޯނާއެކު މިއަދަދު އިތުރުވެގެންދާނެ" ފިފްޝީން ވިދާޅުވި އެވެ.
އެސްޑީއެފްސީ އިން ބުނީ ފަށާ މަދަދު ލޯން ސްކީމުގެ ތެރެއިން ލޯން ލިބޭ 60 މީހުންގެ ތެރެއިން 16މީހުންނަކީ އަތޮޅުތަކަށް ނިސްބަތްވާ މީހުން ކަމަށެވެ.
ފަށާ މަދަދު ސްކީމުގެ ދަށުން ހަ ޕަސެންޓް އިންޓްރެސްޓް ރޭޓުގައި 500،000 ރުފިޔާއާ ހަމައަށް މާލީ އެހީތެރިކަން ފޯރުކޮށްދޭނެ އެވެ. ލޯނަށް އަނބުރާ ފައިސާ ދެއްކުމަށް އެއް އަހަރުގެ ގްރޭސް ޕީރިއަޑެއް ލިބެ އެވެ. އަދި ލޯން ދައްކާ ހަލާސްކުރުމަށް ހަތް އަހަރުގެ މުއްދަތެއް ލިބެ އެވެ.
ރައީސް ޑރ. މުހައްމަދު މުއިއްޒުގެ ހަފްތާ 14ގެ މަގުޗާޓުގައި "ފަށާ މަދަދު" ލޯން ތައާރަފްކުރުމަށް ހިމަނާފައިވެ އެވެ.