ލުބްނާންގައި ޕޭޖަރުތައް ގޮއްވާލީ އަހަރެން ބުނެގެން: ނަތަންޔާހޫ

ލުބްނާންގައި މީގެ ދެތިން މަހެއްހާ ދުވަސް ކުރިން -- ސެޕްޓެމްބަރު 17 އަދި 18 ގައި، ޖެހިޖެހިގެން ދެދުވަހު -- އެއްފަހަރާ އެތައް ހާސް ޕޭޖަރުތަކެއް ގޮއްވާލީ އޭނާގެ ހާއްސަ އަމުރަކަށް ކަމަށް އިޒުރޭލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވެއްޖެ އެވެ.

މިއީ މި ހަމަލާއާ ބެހޭ ގޮތުން ނަތަންޔާހޫ މިހާ ފާޅުކަން ބޮޑު ގޮތެއްގައި ވާހަކަދައްކަވައި އިގުރާވެވަޑައިގެންނެވި ފުރަތަމަ ފަހަރެވެ. ބެލެވޭ ގޮތުގައި އާންމު ޕޯޑިއަމެއްގައި މި ގޮތަށް ވިދާޅުވުމުގެ ކުރިން އެމެރިކާގެ ހުއްދަ އޮންނާނީ ނަތަންޔާހޫއަށް ލިބިވަޑައިގެންފަ އެވެ.

ޕޭޖަރުތައް ގޮއްވާލީ އިޒުރޭލުން ކަމަށް އޭރުވެސް ލުބުނާނުން ބުންޏެވެ. މި ހާދިސާގައި 26 މީހަކު މަރުވެ، 3،200 އަށް ވުރެ ގިނަ މީހުންނަށް ބޮޑެތި ޒަހަމްތަކެއް ލިބުނެވެ.

ނަތަންޔާހޫ ކެބިނެޓް ބައްދަލުވުމެއްގައި ވަޒީރުންނާ މުހާތަބުކުރައްވައި ވިދާޅުވީ ގޮތުން ޕޭޖަރު ހަމަލާތަކާ ދެކޮޅު ވެރިން އޭނާގެ ސަރުކާރުގައި އޭރު ތިއްބެވި އެވެ. އަދި ސިޔާސީ ބައެއް ލީޑަރުން ވެސް އެ ހަމަލާއާ ދެކޮޅު ކަމަށް ނަތަންޔާހޫ ވިދާޅުވި އެވެ. އަދި ހިޒްބުﷲގެ ލީޑަރު ހަސަން ނަސްރުﷲ މަރާލަން ހިންގި އޮޕަރޭޝަނަކީ ވެސް އޭނާގެ ސަރުކާރުގެ ބައެއް ވެރިންގެ ނުރުހުމާ އެކު ހިންގި އޮޕަރޭޝަނެއް ކަމަށް ނަތަންޔާހޫ ވިދާޅުވި އެވެ.

ސަރުކާރުގެ ބައެއް ވެރިން އަދި ސިޔާސީ ލީޑާރުންގެ ވިސްނުމަކަށް ވެފައި އޮތީ ނަސްރުﷲ މަރާނުލުން ކަމަށް ނަތަންޔާހޫ ވިދާޅުވި އެވެ. އަދި އިޒުރޭލަށް ލިބިފައި ހުރި ބާރުތަކުން ޕޭޖަރުތައް ގޮއްވާލުން ކަހަލަ ބާރުތައް ބޭނުން ނުކުރުމަށް އޭނާއަށް ބަޔަކު ލަފާދެއްވި ކަމަށް ވެސް ނަތަންޔާހޫ ވިދާޅުވި އެވެ.

ލުބްނާންގައި ޕޭޖަރުތައް ގޮއްވާލުމަކީ އެމެރިކާ ނުރުހޭނެ ކަމެއް ކަމަށް ބުނެ ބައެއް ލީޑާރުން އޭނާއަށް ދެއްވި ލަފާ ގަބޫލުނުކުރެއްވި ކަމަށްވެސް ނަތަންޔާހޫ ވިދާޅުވި އެވެ.

އިޒުރޭލުގެ ދުޝްމަނުންނާ މެދު އަމަލުކުރަން ޖެހޭ ގޮތް އެނގިވަޑައިގަންނަވާނީ ސަރުކާރުގެ ވެރިޔާ ގޮތުގައި ދައުލަތާ ހަވާލުވެ ހުންނަވާ ބޭފުޅަކަށް ކަމަށް ނަތަންޔާހޫ ވިދާޅުވި އެވެ.

ސިޔާސީ މަގާމުތަކުގައި ތިއްބެވި ލީޑާރުންގެ އެދުމަކަށް ވެފައި އޮތީ ގައުމަށް ވުރެ އެ މީހުންގެ މަގާމު ދިފާއުކުރެއްވުން ކަމަށްވެސް ނަތަންޔާހޫ ވިދާލޫވި އެވެ.

އިޒުރޭލުން ލުބްނާނަށް ދެމުންދާ ހަމަލާތަކުގައި -- ލުބްނާންގެ ސިއްހަތާ ބެހޭ ވުޒާރާއިން ބުނާ ގޮތުން -- 3،100 އަށް ވުރެ ގިނަ މީހުން ވަނީ މަރުވެފަ އެވެ. އަދި 13،800 އަށް ވުރެ ގިނަ މީހުން ވަނީ ޒަހަމްވެފަ އެވެ.