އިޒުރޭލުން ލުބްނާނަށް ދެމުންދިޔަ ފަނާކުރަނިވި ހަމަލާތައް ހުއްޓާލުމުގައި، ބުނެވޭ ގޮތުގައި އެމެރިކާގެ ދައުރު ބޮޑެވެ. އެމެރިކާއިން ހިޒްބުﷲ އާ ހަނގުރާމަކުރަން ބޭނުންނުވި ސަބަބުތަކުގެ ތެރޭގައި، އިޒުރޭލުގެ ހަމަނުޖެހުން ގެއްލިދާނެ ކަމަށް ބެލެވުން ހިމެނެ އެވެ.
އިޒުރޭލުން ލުބްނާނަށް ހަމަލާތައް ދޭން ފެށިއިރު ވެސް، އެމެރިކާގެ ހުއްދަ ނެތި ހަމަލާތައް ނުފަށާނެ ކަމަށް އޮތީ ބެލެވިފަ އެވެ. އަދި ހަމަލާތައް ހުއްޓުވާލުމުަގައި ވެސް އެމެރިކާގެ ބައިވެރިވުމެއް ނެތި އިޒުރޭލުން ހަމަލާތައް ހުއްޓައިނުލާކަން ދުނިޔެއަށް އެނގެ އެވެ.
އެމެރިކާ އެދުނު ގޮތަށް ލުބްނާނަށް ދިން ހަމަލާތައް އިޒުރޭލުން ހުއްޓާލުމުގެ ބަދަލެއް ގޮތުން 680 މިލިއަން ޑޮލަރުގެ ހަތިޔާރު ވިއްކާ ގޮތަށް ނިންމައި ބައިޑަން ވަނީ ޚާއްސަ އަމުރެއްގައި ސޮއިކުރައްވާފަ އެވެ.
ބައިޑަން ވިދާޅުވި ގޮތުން އިޒުރޭލުގެ ރައްކާތެރިކަމަށް ކޮންމެހެން ވެސް އަސްކަރީ އެހީތެރިކަން ބޭނުންވެ އެވެ. އިޒުރޭލު އަތުގައި -- އެމެރިކާގައި އުފައްދާ ޒަމާނީ ހަތިޔާރު ހުންނަން ޖެހެނީ، އެމެރިކާ ދެކޭ ގޮތުގައި ކޮންމެހެން ހަނގުރާމައެއް ކުރުމަކަށް ނޫނެވެ.
އިޒުރޭލުގެ ބޮޑުވަޒީރު ބެންޖަމިން ނަތަންޔާހޫއާ ހަވާލާދީ އެމެރިކާގެ ނޫސްތަކުން ބުނާ ގޮތުން ލުބްނާނަށް ހަމަލާދިނުން އިޒުރޭލުން ހުއްޓާލީ އެމެރިކާއަށް ތިން ޝަރުތެއް ކުރުމަށް ފަހު އެވެ.
އޭގެ ތެރެއިން ވެސް އެންމެ ބޮޑަށް ބާރުއަޅާފައި ވަނީ، އިޒުރޭލުން ހުސްވާއަތަށް އަޅާފައި ހުރި ހަތިޔާރު ގުދަންތައް އާކުރަން އެމެރިކާއިން އެހީތެރިވުމެވެ.
އިޒުރޭލަށް ހަތިޔާރު ވިއްކުމާ މެދު ގޮތެއް ނިންމައިދިނުމަށް އެދި ބައިޑަން ސަރުކާރުން ގާނޫންހަދާ މަޖިލީހަށް ހުށަހަޅާފައި އޮތް ނަމަވެސް -- މި ކަރުދާހަށް ބަހުސްކުރުމެއް ނެތި ބައިޑަން އެދިވަޑައިގަތުމަށް ހުއްދަ ވަނީ ލިބިފަ އެވެ.
ފައިނޭންޝަލް ޓައިމްސްއިން ނަތަންޔާހޫއާ ހަވާލާދީ ޝާއިއުކޮށްފައި އޮތް ރިޕޯޓަށް ކޮމެންޓްކުރަން ބައިޑަން ސަރުކާރުގެ އިސް އޮފިޝަލުން ބޭނުން ނުވި ނަމަވެސް، ލުބްނާން ހަމަލާތައް ހުއްޓާލުމަށް އިޒުރޭލަށް ހަތިޔާރު ވިއްކުން ޝަރުތުނުކުރާ ކަމަށް ބައެއް އޮފިޝަލުން ވިދާޅުވި އެވެ.
އިޒުރޭލުން ލުބްނާނަށް ހަމަލާތައް ހުއްޓާލީ 60 ދުވަހަށެވެ. މި މުއްދަތުގެ ތެރޭގައި އިޒުރޭލުގެ އަސްކަރިއްޔާގެ އާބާތުރަ މުޅިން ފިލުވައި ހަނގުރާމައަށް ތައްޔާރުވާނެ އެވެ. އަދި ލުބްނާނުން ކުށް ހޯދައި -- އެއްބަސްވުމާ ޚިލާފުވި ކަމަށް ބުނެ އެމެރިކާޢިން ދޭ އާ ހަތިޔާރުން ހަމަލާތައް ފަށާނެ އެވެ.