ފަލަސްތީނުގެ ނަސްލު ނައްތާލަން އިޒްރޭލުން ދޭ ހަމަލާތަކާ ގުޅިގެން އިޒްރޭލްގެ ޕާސްޕޯޓުގައި ރާއްޖެއަށް އެތެރެވުން މަނާކުރަން ގާނޫނަށް ހުށަހަޅާފައިވާ އިސްލާހާ މެދު ގޮތެއް ނިންމުމުގެ މައްސަލަ ސަލާމަތީ ހިދުމަތްތަކާ ބެހޭ ކޮމިޓީގައި ތާށިވެފައި އޮތް އޮތުން ބަލައި، އެ މައްސަލަ އަވަސް ކުރުމަށް ގޮވާލާ ގަރާރެއް ރައްޔިތުންގެ މަޖިލީހަށް ހުށަހަޅައިފި އެވެ.
މި ގަރާރު މަޖިލީހަށް ހުށަހެޅުއްވީ އިދިކޮޅު އެމްޑީޕީގެ ގަލޮޅު އުތުރު ދާއިރާގެ މުހައްމަދު އިބްރާހީމް އެވެ. މި ގަރާރު އޮތީ މާދަމާގެ މަޖިލީހުގެ އެޖެންޑާގައި ހިމަނާފަ އެވެ.
އިޒްރޭލު ޕާސްޕޯޓް މަނާކުރުމާ ގުޅޭ ކަންކަން އަވަސް ކުރުމަށް ގަރާރެއް ހުށަހެޅިއިރު، ފަލަސްތީނުގެ ނަސްލު ނައްތާލަން އިޒްރޭލުން ދޭ ހަމަލާތަކާ ގުޅިގެން އިޒްރޭލްގެ ޕާސްޕޯޓުގައި ރާއްޖެ އަށް އެތެރެވުން މަނާކުރަން ގާނޫނަށް ހުށަހަޅާފައިވާ އިސްލާހާ މެދު ގޮތެއް ނިންމުމުގެ މައްސަލަ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ)ގެ މާދަމާގެ ބައްދަލުވުމަށް ވަނީ އެޖެންޑާވެސް ކޮށްފަ އެވެ.
އެ ބިލްގައި ވަނީ އިޒްރޭލްގެ ޕާސްޕޯޓާއި އެހެން ގައުމެއްގެ ޕާސްޕޯޓެއް އޮތް ނަމަވެސް އިޒްރޭލް ޕާސްޕޯޓެއް ނަމަ ރާއްޖެ އެތެރެވުމުގެ ހުއްދަ ނެތް މީހެއްގެ ގޮތުގައި ކަނޑައެޅުމަށެވެ.
އެ ބިލްވެސް ރައްޔިތުންގެ މަޖިލިހަށް ހުށަހެޅުއްވީ އިދިކޮޅު އެމްޑީޕީގެ ގަލޮޅު ދެކުނު ދާއިރާގެ މީކާއިލް އަހުމަދު ނަސީމު އެވެ.
އެ ބިލާ މެދު މަޖިލީހުގެ ތަޅުމުގައި މެމްބަރުން ބަހުސް ކުރައްވައި، އެ ބިލް ދިރާސާކޮށް ގޮތެއް ނިންމަން މިދިޔަ ޖޫން 10 ގައި 241 ކޮމިޓީ އަށް މައްސަލަ ފޮނުވި ނަމަވެސް ފަސް މަސް ނިމުނީ އެއާ ގުޅޭ އެއްވެސް މަސައްކަތެއް ނުކޮށެވެ.