އިޒްރޭލްގެ ޕާސްޕޯޓްގައި ރާއްޖެއަށް އެތެރެވުން މަނާކުރުމަށް ރާއްޖޭގެ އިމިގްރޭޝަންގެ ގާނޫނަށް ހުށަހެޅި އިސްލާހުގެ ބިލްގެ ކޮމިޓީ މަރުހަލާގެ މަސައްކަތް އަވަސްކުރަން ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީ -- 241 ކޮމިޓީން މިއަދު ފާސްކޮށްފި އެވެ.
އިޒްރޭލު ޕާސްޕޯޓްގައި ރާއްޖެއަށް އައުން މަނާކުރުމަށް އިމިގްރޭޝަންގެ ގާނޫނަށް އިސްލާހު ގެނައުމަށް ހުށަހެޅުއްވީ ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމް އެވެ. މި ބިލް ދިރާސާކުރަނީ މަޖިލީހުގެ 241 ކޮމިޓީންނެވެ.
މަޖިލީހުގެ 241 ކޮމިޓީން މިދިޔަ ހަފުތާގައި ނިންމީ ޑިސެމްބަރުގެ ނިޔަލަށް ކަމާބެހޭ އިދާރާތަކަށް ބިލާ ގުޅޭ ގޮތުން ސިޓީ ފޮނުވުމަށްފަހު ލިބޭ ޖަވާބަށް ބެލުމަށްފަހު އެ ފަރާތްތައް ކޮމިޓީއަށް ހާޒިރުކުރުމަށެވެ.
އެ ނިންމުން ބަދަލުކޮށް މާދަމާއިން ފެށިގެން ވެސް ކަމާބެހޭ ފަރާތްތައް ހާޒިރުކޮށް ސުވާލުކުރަން ފާސްވީ މިއަދު ބޭއްވި 241 ކޮމިޓީގެ ބައްދަލުވުމުގަ އެވެ.
މީކާއީލް ހުށަހެޅުއްވި އިސްލާހުގައި ވަނީ އިޒްރޭލްގެ ޕާސްޕޯޓާއި އެހެން ގައުމެއްގެ ޕާސްޕޯޓެއް އޮތް ނަމަވެސް އިޒްރޭލް ޕާސްޕޯޓެއް ނަމަ ރާއްޖެ އެތެރެވުމުގެ ހުއްދަ ނެތް މީހެއްގެ ގޮތުގައި ކަނޑައެޅުމަށެވެ.
އެ ބިލް ދިރާސާކޮށް ގޮތެއް ނިންމަން މަޖިލީހުގެ 241 ކޮމިޓީއަށް ފޮނުވީ މިއަހަރުގެ ޖޫން 10 ވަނަ ދުވަހު އެވެ.