ކަނޑުމަގުން ރާއްޖެއަށް އެތެރެކުރި 3.3 ކިލޯގްރާމުގެ ޑްރަގު އަތުލައިގެންފި އެވެ.
މޯލްޑިވްސް ކަސްޓަމްސް އިން ޑްރަގްސް އަތުލައިގަތީ މާލޭގެ ވިޔަފާރި ބަނދަރުން މިދިޔަ އާދިއްތަ ދުވަހު އެވެ.
ކަސްޓަމްސްގެ ބެލުމުގެ ދަށަށް ގެންދިޔަ ޑްރަގްސް ތެރޭގައި ހުރީ 2،282 ގްރާމްގެ ކެނެބިސް އާއި 1،038 ގްރާމްގެ ކެތިނޯން އެވެ.
ކަސްޓަމްސް އިން މިދިޔަ މަހުވެސް ވަނީ ކަނޑުމަގުން ރާއްޖެއަށް އެތެރެ ކުރި 5.9 ކިލޯގެ ޑްރަގް އަތުލައިގެންފަ އެވެ. އެ ފަހަރުވެސް އަތުލައިގަތީ ކެނެބިސް އަދި ކެތިނޯން އެވެ.
މަސްތުވާތަކެތި އަތުލައިގަތުން މިފަހުން ވަނީ ވަރަށް ބޮޑަށް އިތުރުވެފަ އެވެ.
ރައީސް ޑރ. މުހައްމަދު މުއިއްޒުގެ ސަރުކާރުން ވަނީ މަސްތުވާތަކެތީގެ މައްސަލައަކީ ގައުމީ ސަލާމަތަށް ހުރި ނުރައްކަލެއް ކަމަށް ކަނޑައަޅައި ޑްރަގުގެ މައްސަލަ ހައްލުކުރުމަށް ހާއްސަ އިސްކަމެއް ދީފަ އެވެ.