ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ބޫޓާންގެ ބޮޑުވަޒީރު ޝެރިން ތޮބްގޭއާ ބައްދަލުކުރައްވައިފި އެވެ.
މި ދެ ބޭފުޅުން މިއަދު ބައްދަލުކުރެއްވީ އަޒަރުބައިޖާންގެ ބާކޫގައި މިހާރު ކުރިއަށްދާ ކޮޕް 29 ސަމިޓްގެ ހަވާސާގައެވެ.
މި ބައްދަލުކުރެއްވުމުގައި ދެ ބޭފުޅުން ވަނީ ކޮޕް29 އަށް ދެ ގައުމުން ހިއްސާކުރާ ތަސައްވުރާއި، މޫސުމީ ހަރަކާތްތެރިކަމާއި، އެއް ގައުމުން އަނެއް ގައުމަށް އެއްބާރުލުން ދެވިދާނޭ ގޮތްތަކާ ގުޅޭގޮތުން މަޝްވަރާކުރައްވާފަ އެވެ.
މި ބައްދަލުކުރެއްވުމުގައި ރައީސް މުއިއްޒު ވަނީ ދެ ގައުމުގެ ގުދުރަތީ ތަފާތުތަކާއެކުވެސް ދެ ގައުމުން ހިއްސާކުރާ އެކުވެރިކަން ފާހަގަކުރައްވާފަ އެވެ. އަދި ގްލޭޝިއަލް މެލްޓިން އާއި ކަނޑުގެ ލޮނުގަނޑު އުފުލުން ފަދަ މޫސުމީ ބަދަލުތަކުން ކުރިމަތިވާ ގޮންޖެހުންތަކުގެ މައްޗަށް ވާހަކަދެއްކެވި އެވެ.
ދުނިޔޭގެ ފުރަތަމަ ކާބަން-ނެގަޓިވް ގައުމަކީ ބޫޓާން ކަމުގައިވާތީ އާއި މޫސުމީ ބަދަލުތަކުން ކުރާ އަސަރުތައް ކުޑަކުރުމަށް އެ ގައުމުން ކުރާ އީޖާދީ މަސައްކަތްތައް ފާހަގަކުރައްވައި ރައީސް ވަނީ ބޮޑުވަޒީރު ތޮބްގޭއަށް ތަހުނިޔާ ވިދާޅުވެފަ އެވެ. އަދި މޫސުމީ މައްސަލަތަކުގައި ހާއްސަކޮށް މޫސުމަށް އަންނަ ބަދަލުތަކުން ކުރާ ނޭދެވޭ އަސަރުތައް ކުޑަކުރުމަށް އަޑުއުފުލުމުގައި އެކުގައި މަސައްކަތްކުރުމަށް، ދެ ލީޑަރުން ވަނީ އެއްބަސްވެވަޑައިގެންފަ އެވެ.
މި ބައްދަލުކުރެއްވުމުގައި ބޫޓާންގެ ބޮޑުވަޒީރު ޝެރިން ތޮބްގޭ ވަނީ ދެ ގައުމުން ގުޅިގެން މަސައްކަތް ކުރުމަށް ތާއީދުކުރައްވައި މޫސުމީ މައްސަލަތަކުގައި ރައީސް މުއިއްޒު އަދާކުރައްވާ އިސް ދައުރަށް ހިތްވަރު ދެއްވާ ފައެވެ. އަދި މި މައްސަލައިގައި ބޫޓާނުން އީޖާދުކުރި ބައެއް ކާމިޔާބު ހައްލުތައްވެސް ރައީސްއާ ހިއްސާކުރެއްވި އެވެ. މޫސުމީ މައްސަލަތަކުގައި ބޮޑެތި މުއްސަނދި ގައުމުތަކުން އަޅާ ފިޔަވަޅުތައް ހަރުދަނާކުރުމަށްޓަކައި، މޫސުމީ ބަދަލުތަކުގެ ނުރައްކަލަށް ހުށަހެޅިފައިވާ ގައުމުތަކުން އެކުގައި މަސައްކަތްކުރުމުގެ މުހިއްމުކަން ބޮޑުވަޒީރު ފާހަގަކުރެއްވި އެވެ.
މި ބައްދަލުކުރެއްވުން ނިންމަވާލެއްވީ ފަންނީ މައުލޫމާތާއި، ކާމިޔާބު ތަޖުރިބާތައް ހިއްސާކުރުމަށާއި، މޫސުމީ ވިލުންތެރިކަން އިތުރުކުރުމުގައި ދެ ގައުމުގެ އެއްބާރުލުން އިތުރުކުރުމަށް އެއްބަސްވެވަޑައިގަންނަވަމުންނެވެ. އަދި ދޭދޭ ގުޅުންތައް އިތުރަށް ހަރުދަނާކުރުމަށާއި، އިންވެސްޓްމަންޓްގެ ދާއިރާގައި އެއްބާރުލުން ދިނުމަށްވެސް، ދެ ބޭފުޅުން މަޝްވަރާކުރެއްވި އެވެ.