ޓްރެފިކިން މައްސަލައެއްގައި އުމުރަށް ޖަލަށްލާފައި ހުރި މީހަކު އަނެއްކާވެސް މަސްތުވާތަކެތީގެ މައްސަލައެއްގައި ހައްޔަރުކޮށްފި އެވެ.
އުމުރަށް ޖަލަށްލާފައި ހުއްޓާ، މަސްތުވާތަކެތީގެ މައްސަލައެއްގައި އަނެއްކާވެސް ހައްޔަރުކޮށްފައިވަނީ، ރ. އިންނަމާދޫ، ފެމޯރާގެ، މުހައްމަދު ސަލީމް ކިޔާ އުމުރުން ދުވަސްވީ މީހެކެވެ.
ބަންދު އަމުރު ރިޕޯޓުން އެނގޭ ގޮތުގައި މުހައްމަދު ސަލީމްގެ އުމުރަކީ 65 އަހަރެވެ.
އޭނާ މި ފަހުން ހައްޔަރުކޮށްފައިވަނީ މަސްތުވާތަކެތި ބޭނުންކުރުމާއި އޭގެ ވިޔަފާރި ކުރާކަމުގެ ތުހުމަތުގައެވެ.
ސަލީމު ބަންދުކޮށް ކޯޓަށް ހާޒިރުކުރުމުން އޭނާ 15 ދުވަހު ބަންދުގައި ބެހެއްޓުމަށް ކްރިމިނަލް ކޯޓުން ވަނީ އަމުރުކޮށްފަ އެވެ. އެ އަމުރުކޮށްފައިވަނީ ގާޒީ އަލީ ނަދީމް އެވެ. އެކަމަކު އޭނާގެ ކުށުގެ އެއްވެސް ރެކޯޑެއް އޮތް ކަމެއް ނަދީމްގެ އަމުރުގައި ފާހަގަކުރައްވާފައެއް ނުވެ އެވެ.
ބަންދު އަމުރު ރިޕޯޓުން އެނގޭ ގޮތުގައި މުހައްމަދު ސަލީމް އަތުން ދެ ގްރާމްގެ މެތު އަދި އެއް ގްރާމްގެ ހެރޮއިން ފެނިފައިވާކަން ބަޔާންކޮށްފައިވެ އެވެ.
ގާނޫނީ ގޮތުން ބަލާއިރު އެއީ ގިނަ އަދަދެއްކަން ފާހަގަކުރައްވައި ގާޒީ ވިދާޅުވީ މުހައްމަދު ސަލީމަކީ މަސްތުވާތަކެތީގެ ވިޔަފާރީގައި ބައިވެރިވުމެއް އޮތް މީހެއް ކަމަށް ބެލެވޭ ކަމަށެވެ. އެހެންކަމުން އޭނާ ބަންދުން ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކަލެއް އޮތް ކަމަށް ގާޒީ ވިދާޅުވި އެވެ.
ރެކޯޑްތަކުން ދައްކާ ގޮތުގައި 2016 ވަނަ އަހަރު، ޑައިމޯފިން ޓްރެފިކިން މައްސަލައެއްގައި މުހައްމަދު ސަލީމްގެ މައްޗަށް 100،000 ރުފިޔާގެ ޖޫރިމަނާއަކާއެކު އޭނާ އުމުރަށް ޖަލަށްލާން ހުކުމްކޮށްފައިވެ އެވެ. އެ ހުކުމް އޭނާގެ ފަރާތުން ހައިކޯޓުގައި އިސްތިއުނާފުކޮށްފައިވާ ކަމަށްވެސް ރެކޯޑްތަކުން ދައްކަ އެވެ.
ރެކޯޑްތަކުން ދައްކާ ގޮތުގައި ހައިކޯޓުން އެ މައްސަލަ 2022 ވަނަ އަހަރު ނިންމީ އޭނާއާ ދެކޮޅަށެވެ. އެ މައްސަލަ ސުޕްރީމް ކޯޓަށް ހުށަހެޅުނު ކަމެއް އެ ކޯޓުގެ ރެކޯޑްތަކަކުން ނުދައްކަ އެވެ. އެހެންކަމުން ބެލެވޭ ގޮތުގައި މުހައްމަދު ސަލީމަކީ އުމުރަށް ޖަލަށްލާފައިވާ މީހެކެވެ.