އެމެރިކާގެ ރައީސް ޖޯ ބައިޑަންއާއި އިންތިހާބީ ރައީސް ޑޮނަލްޑް ޓްރަމްޕް، ވައިޓް ހައުސްގައި ބައްދަލުކުރައްވައި، ވެރިކަން ބަދަލުކުރުމާއި މުހިއްމު ސިޔާސީ މައްސަލަތަކާ މެދު މަޝްވަރާ ކުރައްވައިފި އެވެ.
ވައިޓް ހައުސްގެ ތަރުޖަމާނު ކަރިން ޜޮން-ޕިޔޭ ވިދާޅުވި ގޮތުގައި މި ބައްދަލުވުމުގައި ދެ ބޭފުޅުން ވަނީ ދާހިލީ އަދި ބައިނަލްއަގްވާމީ މައްސަލަތަކާ ގުޅޭގޮތުން ފުޅާ ދާއިރާއެއްގައި މަޝްވަރާކުރައްވާފަ އެވެ. މީގެތެރޭގައި ރަޝިޔާ-ޔޫކްރެއިން ހަނގުރާމައާއި މެދުއިރުމަތީގެ ހަމަނުޖެހުން ހިމެނެ އެވެ.
މިބައްދަލުވުމުގައި ބައިޑަން ވަނީ ޔޫކްރެއިނަށް ދެމުންދާ އެހީތެރިކަން މެދުނުކެނޑުމަށް ޓްރަމްޕްގެ އަރިހުން އެދިވަޑައިގެންފަ އެވެ.
ގައުމީ ސަލާމަތާ ބެހޭ މުޝީރު ޖޭކް ސަލިވަން ވިދާޅުވި ގޮތުގައި ޔޫކްރެއިނަށް އެހީތެރިވުމަކީ އެމެރިކާގެ ސަލާމަތަށް މުހިއްމު ކަމެއް ކަމުގައި ބައިޑަން ފާހަގަކުރެއްވި އެވެ.
އަންނަ އަހަރުގެ ޖެނުއަރީ 20 ވަނަ ދުވަހު އެމެރިކާގެ ވެރިކަން ބަދަލުވެގެންދާއިރު އެ މަރުހަލާ އޮމާންކަމާއެކު ކުރިއަށް ގެންދިއުމާ ގުޅޭގޮތުން ދެ ބޭފުޅުން މަޝްވަރާކުރެއްވި ކަމަށްވެސް ރިޕޯޓްތައް ބުނެ އެވެ.
"އޮމާންކަމާއެކު ވެރިކަން ބަދަލުކުރުމުގެ ކަންކަން ކުރިއަށް ގެންދެވޭނެ ކަމަށް އުއްމީދުކުރަން," ބައިޑަން ވިދާޅުވި އެވެ.
މި ބައްދަލުވުމަކީ ބައިޑަންގެ ދައުވަތަކަށް ބޭއްވި ބައްދަލުވުމެކެވެ. 2020 ވަނަ އަހަރުގެ އިންތިހާބާ ޚިލާފަށް، މިފަހަރު ވެރިކަން ބަދަލުކުރުމުގެ ކަންކަން އޮމާންކަމާއެކު ކުރިއަށް ގެންދެވޭނެ ކަމުގެ އުއްމީދު ވައިޓް ހައުސް އިން ފާޅުކުރެ އެވެ.